बरेली हादरले! महिला डॉक्टरवर अत्याचार करून बनवले अश्लील व्हिडिओ; ५० लाखांसाठी ब्लॅकमेल करणाऱ्या जिम चालक भावांना पोलिसांनी ठोकल्या बेड्या

बरेली: उत्तर प्रदेशातील बरेली येथे एका चाळीस वर्षीय महिला डॉक्टरला गुंगीचे औषध देऊन तिच्यावर बलात्कार केल्याची आणि त्यानंतर अश्लील व्हिडिओच्या जोरावर ५० लाख रुपयांची मागणी केल्याची खळबळजनक घटना उघडकीस आली आहे. याप्रकरणी पोलिसांनी 'अल्टीमेट फिटनेस जिम'चे संचालक अकरम बेग आणि त्याचा भाऊ आलम बेग या दोघांना अटक केली आहे. विशेष म्हणजे, ही जिम कॅबिनेट मंत्री धर्मपाल सिंह यांच्या भावाच्या मालकीच्या इमारतीत सुरू होती.

वजन कमी करण्याचे आमिष अन् अमली पेयाचा वापर
पीडित महिला डॉक्टर गेल्या दोन वर्षांपासून या जिममध्ये व्यायामासाठी जात होत्या. जिम चालक अकरमने त्यांना लवकर वजन कमी करण्याचे आमिष दाखवले आणि एका विशिष्ट 'प्री-वर्कआऊट ड्रिंक'मध्ये नशिल्या पदार्थांचे मिश्रण करून त्यांना पाजले. डॉक्टर बेशुद्ध पडल्यानंतर अकरमने त्यांना जिममधील एका खाजगी खोलीत नेऊन त्यांच्यावर अत्याचार केला. यावेळी त्याचा भाऊ आलम याने मोबाईलमध्ये चित्रीकरण केले, तर खोलीत आधीच लावलेल्या हिडन कॅमेऱ्यातही हे सर्व कैद झाले.

५० लाखांची खंडणी आणि जीवे मारण्याची धमकी
काही दिवसांनंतर आरोपींनी महिला डॉक्टरला हे व्हिडिओ दाखवून सुरुवातीला १० लाख आणि नंतर ५० लाख रुपयांची मागणी केली. बदनामीच्या भीतीने पीडितेने त्यांना ८० हजार रुपये दिले, मात्र आरोपींची भूक वाढतच गेली. त्यांनी डॉक्टरच्या घरी जाऊन त्यांना जीवे मारण्याची धमकी दिली. या छळाला कंटाळून अखेर पीडितेने ४ मे रोजी पोलीस ठाण्यात तक्रार दाखल केली.

अनेक महिलांचे व्हिडिओ शूट केल्याची कबुली
पोलीस तपासात दोन्ही आरोपींच्या मोबाईल आणि पेनड्राईव्हमधून अनेक अश्लील व्हिडिओ जप्त करण्यात आले आहेत. अकरमने कबुली दिली की, तो जिममध्ये येणाऱ्या महिलांशी जवळीक साधून त्यांना अमली पेय पाजत असे आणि नंतर त्यांचे व्हिडिओ बनवून त्यांना ब्लॅकमेल करत असे. जिमच्या झडतीदरम्यान पोलिसांना अनेक संशयास्पद 'शक्तिवर्धक' औषधे, स्टिरॉइड्स आणि इंजेक्शनच्या सिरिंजही सापडल्या आहेत.

'जिम जिहाद'चा आरोप; हिंदू महासभेची चौकशीची मागणी
या घटनेनंतर हिंदू महासभेचे जिल्हाध्यक्ष पंकज श्रीवास्तव यांनी याला 'जिम जिहाद' असे संबोधले आहे. जिमच्या नावाखाली हिंदू महिलांना लक्ष्य केले जात असल्याचा आरोप त्यांनी केला असून, शहरातील सर्व जिमची सखोल चौकशी करण्याची आणि प्रत्येक जिममध्ये महिला ट्रेनर अनिवार्य करण्याची मागणी प्रशासनाकडे केली आहे. पोलिसांनी दोन्ही आरोपींना अटक केली असून त्यांची कसून चौकशी सुरू आहे.