Pune : ‘डिजिटल अरेस्ट’चा फसवा जाळा; सीबीआय अधिकारी असल्याचं भासवत पुण्यात आजोबांकडून १ कोटी रुपये लंपास

Pimpri-Chinchwad : पिंपरी-चिंचवडमध्ये ‘डिजिटल अरेस्ट’ची धक्कादायक बातमी समोर आली आहे. सीबीआय अधिकारी असल्याचं भासवून तब्बल 1 कोटी रुपयांची फसवणूक केल्याचा प्रकार समोर आला आहे. या घटनेमुळे अनेकांच्या भुवया उंचावल्या आहेत. आरोपीने सीबीआय ( CBI ) अधिकारी असल्याचे भासवून एका ज्येष्ठ नागरिकाला मनी लाँड्रिंग प्रकरणात अडकवण्याचा दावा केला. तसेच मनी लाँड्रिंगमध्ये अडकवण्याची भीती दाखवत तब्बल 1 कोटी रुपयांची फसवणूक करण्यात आल्याचा धक्कादायक प्रकार उघडकीस आला आहे. या प्रकरणी पिंपरी-चिंचवड सायबर पोलिसांनी काही मोबाईल क्रमांक आणि बँक खात्यांविरोधात गुन्हा दाखल केला आहे.

चिंचवड येथील शिवाजी पार्क परिसरात राहणारे 77 वर्षीय अशोक कृष्णा सराफ यांना आरोपींनी फोन करून संपर्क साधला. सुरुवातीला आरोपींनी स्वतःची ओळख टेलिफोन विभागातील अधिकारी अशी करून दिली. त्यानंतर सर्व्हिलन्स अधिकारी आणि पुढे सीबीआय अधिकारी असल्याचे भासवत सराफ यांच्याशी सातत्याने संपर्क ठेवला.

आरोपींनी सराफ यांना त्यांच्या नावावरील कॅनरा बँकेच्या खात्याचा वापर नरेश गोयल यांच्यावरील ईडी (ED) कारवाईशी संबंधित मनी लाँड्रिंगसाठी झाल्याचा बनाव केला. यामुळे त्यांना अटक होऊ शकते, अशी भीती दाखवत मानसिक दबाव टाकण्यात आला.

Nagpur : नागपूर मेट्रोच्या दुसऱ्या टप्प्याला वेग! 43.8 किमीचा विस्तार, शहर चारही दिशांनी जोडणार; कोणते मार्ग असणार कार्यान्वित?

‘डिजिटल अरेस्ट’ची भीती निर्माण करून आरोपींनी सराफ यांना त्यांच्या बँक खात्यातील तसेच म्युच्युअल फंडातील रकमेची ‘लीगल व्हेरिफिकेशन’ (वैधता तपासणी) करायची असल्याचे सांगितले. तपासणी पूर्ण झाल्यानंतर संपूर्ण रक्कम परत केली जाईल, असे आश्वासन देत सराफ यांना ठराविक बँक खात्यांवर पैसे ट्रान्सफर करण्यास भाग पाडण्यात आले.

या फसवणुकीत सराफ यांनी एकूण 1 कोटी रुपये ट्रान्सफर केले. मात्र, रक्कम पाठवल्यानंतर आरोपींनी संपर्क तोडला आणि कोणतीही रक्कम परत मिळाली नाही. फसवणूक झाल्याचे लक्षात आल्यानंतर सराफ यांनी सायबर पोलिसांकडे तक्रार दाखल केली.

या प्रकरणी पिंपरी-चिंचवड सायबर पोलिसांनी भारतीय न्याय संहिता (BNS) कलम २०५, ३०८(१), ३१८(४) तसेच माहिती तंत्रज्ञान कायद्याच्या कलम ६६(सी) आणि ६६(डी) अंतर्गत गुन्हा दाखल केला आहे. पोलीस निरीक्षक नाळे या प्रकरणाचा पुढील तपास करत आहेत.