Pune : सोशल मीडियातून जाळं, अमनची निर्घृण हत्या; मोबाईल ‘दृश्यम’ पॅटर्नने ट्रकमध्ये फेकल्याचा खुलासा

Pune  : पुण्यातील विश्रांतवाडी भागातून हरवलेल्या 17 वर्षीय अल्पवयीन मुलाचे अपहरण करून चाकूने गळा चिरून दगडाने ठेचून निर्घृण खून केल्याचे तपासात निष्पन्न झाले आहे. खेड शिवापूर परिसरातून काल बुधवारी दुपारी मुलाचा मृतदेह मिळून आला. ‘इन्स्टाग्राम’वर ओळख झालेल्या एका मुलीच्या मदतीने मुलाला खेड शिवापूरमध्ये बोलावल्याचे समोर आले आहे. ‘दृश्यम’प्रमाणे आरोपींनी खून करून पोलिसांची दिशाभूल करण्यासाठी मृताचा मोबाइल ट्रकमध्ये फेकून दिला. मात्र, पोलिसांनी कौशल्याने तपास करून आरोपींच्या मुसक्या आवळल्या.

जुन्या वादाचा प्रचंड राग
अमन सुरेंद्रसिंग गच्चड (वय 17, रा. टिंगरेनगर, विश्रांतवाडी) असे खून झालेल्या मुलाचे नाव आहे. या प्रकरणी आई अनिता गच्चड (वय 44) यांनी फिर्याद दिली आहे. त्यावरून प्रथमेश चिंधू आढळ (वय 19, रा. उत्तमनगर), नागेश बालाजी घबले (वय 19, रा. शिवणे) यांना अटक केली असून, दोन अल्पवयीन मुलांना ताब्यात घेतले आहे. अमनचे काही महिन्यांपूर्वी प्रथमेश आढळ याच्यासोबत भांडण झाले होते. अमन आणि त्याच्या मोठ्या भावाने आढळवर कोयत्याने वार केले होते. याप्रकरणी अमन आणि त्याच्या भावावर गुन्हा दाखल झाला होता. मोठा भाऊ कारागृहात शिक्षा भोगत आहे, तर अमन अल्पवयीन असल्याने त्याला सोडून देण्यात आले होते. त्यामुळे आढळ अमनला मारण्याचा प्रयत्नात होता; पण भांडणे झाल्याने अमनचे कुटुंब टिंगरेनगरमध्ये राहण्यास आले होते.

Pune : पुणे रेल्वे अलर्ट मोडवर; 8 स्थानकांवर पार्सल स्कॅनर, संशयास्पद वस्तूंवर तात्काळ कारवाई

मोबाइल चालत्या ट्रकमध्ये फेकला
टिंगरेनगरमध्ये राहण्यास आल्यावर अमनने आरोपींचे नंबर ब्लॉक केले होते. त्यामुळे आरोपींना अमनचा ठावठिकाणा कळत नव्हता. यावेळी एकाने इन्स्टाग्रामवरील मैत्रिणीच्या मदतीने अमनला बोलवले. 29 डिसेंबर 2025 रोजी अमन आणि ती मुलगी कात्रजला भेटल्यावर दुचाकीवरून खेड शिवापूरला गेले. तेथे आरोपींनी अमनचे अपहरण केले आणि चाकूने गळा चिरून, दगडाने ठेचून मृतदेह जंगलात पुरला. त्यानंतर आरोपी बेळगावला पळून गेले.

अमनचे अपहरण केल्यावर आरोपींनी त्याचा मोबाइल चालत्या ट्रकमध्ये फेकून दिला. लोणावळा घाटात गेल्यावर मोबाइल बंद झाला. पोलिसांनी तपास सुरू केल्यावर मोबाइलचे शेवटचे लोकेशन लोणावळा घाटात दाखवत होते; पण पोलिसांनी तांत्रिक विश्लेषणाच्या मदतीने आरोपींची ओळख पटवून फरारी आरोपींना बेळगावमधून अटक केली.