Nashik : शिर्डी दर्शनानंतर परतताना भीषण अपघात, दोन कारंचा जबर धडक; चौघांचा जागीच मृत्यू

Nashik : नाशिक जिल्ह्यातील आंबेगन शिवारात राष्ट्रीय महामार्गावर दोन वाहनांचा समोरासमोर भीषण अपघात झाला. या दुर्घटनेत चार प्रवाशांचा जागीच मृत्यू झाला असून, या अपघातात सहा ते सात प्रवासी गंभीर जखमी झाले आहेत. नाशिकहून पेठच्या दिशेने जाणारी कार आणि विरुद्ध दिशेने येणाऱ्या दुसऱ्या कारमध्ये ही धडक झाली. अपघात इतका भीषण होता की दोन्ही वाहनांचा अक्षरशः चक्काचूर झाला. मृत प्रवाशांचे मृतदेह शवविच्छेदनासाठी दिंडोरी ग्रामीण रुग्णालयात हलवण्यात आले आहेत.

जखमींवर नाशिकच्या जिल्हा शासकीय रुग्णालयात उपचार सुरू आहेत. जखमींपैकी चार महिलांची प्रकृती गंभीर असल्याची माहिती देखील समोर येत आहे. शिर्डी येथे दर्शन घेऊन नाशिकमार्गे गुजरातमधील वापीकडे जात असताना चाचडगाव टोलनाका ओलांडल्यानंतर हा अपघात झाल्याची माहिती आहे. या घटनेमुळे परिसरात शोककळा पसरली असून हळहळ व्यक्त केली जात आहे.

Pune : सोशल मीडियातून जाळं, अमनची निर्घृण हत्या; मोबाईल ‘दृश्यम’ पॅटर्नने ट्रकमध्ये फेकल्याचा खुलासा

दोन दिवसांपूर्वीच असाच भीषण अपघात
दरम्यान, दोन दिवसांपूर्वीच असाच एक भीषण अपघात झाला होता. राहुरी ते शनिशिंगणापूर रस्त्यावर उंबेरे (ता. राहुरी) गावाजवळ रिक्षा व मिनीबस यांची समोरासमोर धडक होऊन यात इगतपुरीजवळील गिरणारे येथील तीन तरुणांचा जागीच मृत्यू झाला, तर दोघे गंभीर जखमी झाले. दुसऱ्या एका घटनेत सटाण्याजवळ ढोलबारे गावाजवळ नवापूर तालुक्यातील आमलीपाडा येथील दाम्पत्याचा जागीच मृत्यू झाला.

इगतपुरीजवळील गिरणारे येथील काही तरुण पालखी घेऊन शिर्डीला गेले होते. त्यातील काही तरुण रिक्षाने (क्र. एमएच 15, एजे 1133) शनिशिंगणापूरला दर्शनासाठी निघाले होते. राहुरीजवळ समोरून येणाऱ्या मिनी बसने (क्र. एमएच 04, एलक्यू 7254) समोरासमोर धडक दिली. यात रिक्षाचा चक्काचूर झाला, मिनीबस तर रस्त्याच्या खाली जाऊन उलटली.

या भीषण अपघातात रिक्षातील दीपक जगन डावखर (वय 22), आकाश मनोहर डावखर (वय 22) व दीपक विजय जाधव (वय 22, सर्व रा. गिरणारे ता. इगतपुरी, जि. नाशिक). हे जागीच ठार झाले. तर, रुपेश गणेश भगत (वय 19) व रोशन गंगाधर डावखर (सर्व रा. गिरणारे) हे गंभीर जखमी झाले.