Nashik : अशोक खरात प्रकरणात मोठे मासे गळाला लागण्याची चिन्हे, उच्चपदस्थ महिला अधिकारी पोलिसांच्या रडारवर

Nashik : बहुचर्चित भोंदूबाबा अशोक खरात प्रकरणात दररोज नवनवीन धक्कादायक माहिती समोर येत आहे. तपासादरम्यान अशोक खरातने पीडित महिलांच्या आधारकार्ड आणि पॅनकार्डचा वापर करून विविध पतसंस्थांमध्ये त्यांच्या नावाने खाती उघडल्याचे उघड झाले आहे. या खात्यांद्वारे कोट्यवधी रुपयांचे व्यवहार करण्यात आल्याची माहिती समोर आली आहे.

दरम्यान, चौकशीदरम्यान खरातच्या मुलाने घरात दररोज मोठ्या प्रमाणात रोख रक्कम येत असल्याची कबुली दिल्याची माहिती आहे. या आर्थिक व्यवहारांच्या पार्श्वभूमीवर या प्रकरणात अंमलबजावणी संचालनालय (ED) कडूनही चौकशी होण्याची शक्यता व्यक्त करण्यात आली आहे.

SIT च्या तपासात नवे धागेदोरे

या प्रकरणाचा तपास करणाऱ्या विशेष तपास पथकाच्या (SIT) हाती काही महत्त्वाचे पुरावे लागले आहेत. त्यानुसार, नाशिकमध्ये पूर्वी कार्यरत असलेल्या एका उच्चपदस्थ महिला अधिकाऱ्याने अशोक खरातला नियमबाह्य मदत केल्याचा संशय व्यक्त करण्यात येत आहे. त्यामुळे संबंधित अधिकारी आता पोलिसांच्या रडारवर आली आहे.

आर्थिक देवाणघेवाणीचा संशय

मिळालेल्या माहितीनुसार, या महिला अधिकाऱ्याने आपल्या पदाचा वापर करून खरातला विविध प्रशासकीय कामांमध्ये मदत केल्याचा संशय आहे. त्याच्या बदल्यात खरातने आपल्या राजकीय संपर्कांचा वापर करून संबंधित अधिकाऱ्याला इच्छित बदली मिळवून देण्यात मदत केल्याची शक्यता वर्तवली जात आहे.

याशिवाय, दोघांमध्ये मोठ्या प्रमाणावर आर्थिक देवाणघेवाण झाल्याचेही प्राथमिक तपासात समोर आल्याची माहिती आहे.

तपास अधिक तीव्र होणार

खरातच्या कथित बेकायदेशीर कारवायांना या अधिकाऱ्याचे संरक्षण होते का, याचाही तपास SIT करत आहे. तांत्रिक पुराव्यांच्या आधारे संशय अधिक गडद होत असून, लवकरच संबंधित महिला अधिकाऱ्याची चौकशी होण्याची शक्यता आहे.

या प्रकरणात पुढील काही दिवसांत आणखी मोठे खुलासे होण्याची शक्यता व्यक्त केली जात आहे.