अखेर निर्णायक टप्पा! अमेरिकेला धक्का; इराणने पाकिस्तानचा शांतता प्रस्ताव फेटाळला, जगभरात खळबळ

 

America And Iran War :अमेरिका–इस्त्रायल आणि इराण यांच्यात सुरू असलेल्या तणावपूर्ण संघर्षामुळे जागतिक स्तरावर चिंता वाढत आहे. या युद्धामुळे ऊर्जा पुरवठा, व्यापार साखळी आणि आंतरराष्ट्रीय स्थैर्यावर गंभीर परिणाम होत असून भारत, पाकिस्तान, चीन यांसह अनेक देश अडचणीत सापडले आहेत.

दरम्यान, युद्ध थांबवण्यासाठी पुढाकार घेतलेल्या पाकिस्तानला मोठा धक्का बसला आहे. पाकिस्तानने इराणकडे 15 कलमी शांतता प्रस्ताव पाठवला होता. मात्र, इराणने हा प्रस्ताव स्पष्ट शब्दांत फेटाळून लावला आहे. त्यामुळे युद्ध आणखी तीव्र होण्याची शक्यता वर्तवली जात आहे.

 

 काय होता प्रस्ताव?

पाकिस्तानने तयार केलेल्या या प्रस्तावात 45 दिवसांची तात्पुरती शस्त्रसंधी आणि होर्मुझ सामुद्रधुनी खुली ठेवण्याची महत्त्वाची अट होती. जागतिक ऊर्जा पुरवठा सुरळीत ठेवण्यासाठी ही तरतूद महत्त्वाची मानली जात होती.

 इराणची भूमिका स्पष्ट

इराणच्या परराष्ट्र मंत्रालयाचे प्रवक्ते इस्माईल बगाई यांनी स्पष्ट केले की, “आम्ही आमच्या राष्ट्रीय हिताच्या अटींवरच कोणतीही चर्चा करू. कोणत्याही दबावाखाली निर्णय घेतला जाणार नाही.”

त्यामुळे पाकिस्तानचा प्रस्ताव इराणने नाकारल्याचे स्पष्ट झाले आहे.

 अमेरिकेची पुढील पावले?

या घडामोडींनंतर आता अमेरिका काय भूमिका घेणार, याकडे जगाचे लक्ष लागले आहे. अमेरिकेचे राष्ट्राध्यक्ष डोनाल्ड ट्रम्प यांनी 7 एप्रिल रोजी इराणमधील ऊर्जा केंद्रांवर कारवाई करण्याचा इशारा दिल्याची माहिती समोर आली आहे.

जागतिक चिंता वाढली

इराणने प्रस्ताव नाकारल्याने मध्यपूर्वेतील तणाव आणखी वाढण्याची शक्यता असून, याचा परिणाम थेट जागतिक अर्थव्यवस्थेवर आणि ऊर्जा बाजारावर होऊ शकतो.

युद्धविरामाच्या आशा मावळत चालल्या असून, पुढील काही दिवस अत्यंत निर्णायक ठरणार आहेत.