Dindori : अपघातात कुटुंबच उद्ध्वस्त, पण वडिलांच्या बाईकमुळे दोन भावंडे थोडक्यात बचावली

Nashik :  दिंडोरी तालुक्यातील इंदोरे येथे घडलेल्या भीषण अपघाताने संपूर्ण परिसर हादरला आहे. विहिरीत कार कोसळून झालेल्या दुर्घटनेत दरगोडे कुटुंबातील नऊ जणांचा दुर्दैवी मृत्यू झाला असून, गावावर एकाच वेळी नऊ जणांवर अंत्यसंस्कार करण्याची वेळ ओढावली आहे. या हृदयद्रावक घटनेमुळे परिसरात शोककळा पसरली आहे.

ही दुर्घटना शुक्रवारी (३ एप्रिल) रात्री घडली. खासगी क्लासचे स्नेहसंमेलन आटोपून परतत असताना दरगोडे कुटुंबाच्या मारुती सुझुकी एमपीव्ही कारवरील चालकाचे नियंत्रण सुटले आणि दिंडोरीतील शिवाजीनगर भागातील राजे बँक्वेट हॉलजवळील शेतातील विहिरीत कार कोसळली. या अपघातात सहा विद्यार्थ्यांसह एकूण नऊ जणांचा पाण्यात बुडून मृत्यू झाला.

प्रशासनाची घटनास्थळी धाव
घटनेची माहिती मिळताच राज्यातील मंत्री आणि वरिष्ठ अधिकारी घटनास्थळी दाखल झाले. अन्न व औषध प्रशासन मंत्री नरहरी झिरवाळ, आपत्ती व्यवस्थापन मंत्री गिरीश महाजन, शिक्षण मंत्री दादा भुसे यांच्यासह अनेक मान्यवरांनी भेट देत परिस्थितीचा आढावा घेतला. या प्रकरणी संबंधित विहीरमालकावर सदोष मनुष्यवधाचा गुन्हा दाखल करण्यात आला असून, धोकादायक विहिरींचा सर्वे करण्याचे आदेश देण्यात आले आहेत.

तसेच मृतांच्या नातेवाइकांना प्रत्येकी पाच लाख रुपयांची आर्थिक मदत जाहीर करण्यात आली आहे. शवविच्छेदनानंतर मृतदेह नातेवाइकांच्या ताब्यात देण्यात आले.

क्षणात संसार उद्ध्वस्त
या अपघातात सुनील दरगोडे, त्यांची पत्नी रेश्मा आणि मुलगी गुणवंती यांचा मृत्यू झाला. त्यांच्या मागे साडेतीन वर्षांचा चिमुकला मुलगा अनाथ झाला आहे. तसेच कुटुंबातील इतर सदस्यांचाही मृत्यू झाल्याने संपूर्ण कुटुंब उद्ध्वस्त झाले आहे.

दुसरीकडे, अनिल दरगोडे यांनी स्वतःच्या डोळ्यांसमोर पत्नी, मुलं आणि नातेवाईकांना गमावल्याने त्यांच्यावर दुःखाचा डोंगर कोसळला आहे. काही क्षणांत सर्व काही संपल्याने परिसरात हळहळ व्यक्त होत आहे.

दोन भावंडांचा थरारक बचाव
या भीषण दुर्घटनेत श्रुती उमरे आणि नरेंद्र उमरे या बहीण-भावाचे प्राण थोडक्यात वाचले. सुरुवातीला ते कारमधून प्रवास करत होते, मात्र परतीच्या वेळी त्यांनी वडिलांच्या दुचाकीवरून जाण्याचा निर्णय घेतला. याच निर्णयामुळे ते या अपघातातून बचावले.