Pune : बारामती पोटनिवडणुकीत उपमुख्यमंत्री सुनेत्रा पवार यांच्याविरोधात ‘बिग बॉस मराठी’ फेम अभिजित बिचुकले मैदानात

Pune : बारामती विधानसभा मतदारसंघाच्या पोटनिवडणुकीसाठी राजकीय घडामोडींना वेग आला आहे. राज्याच्या उपमुख्यमंत्री सुनेत्रा पवार या सोमवारी (६ एप्रिल) उमेदवारी अर्ज दाखल करणार आहेत. त्यांच्या उमेदवारीवेळी मुख्यमंत्री देवेंद्र फडणवीस तसेच महायुतीतील प्रमुख नेते उपस्थित राहण्याची शक्यता आहे.

आतापर्यंत या पोटनिवडणुकीसाठी एकूण १७ जणांनी उमेदवारी अर्ज दाखल केले आहेत. काँग्रेसकडून उमेदवार उभा राहणार की नाही, याबाबत अद्याप स्पष्टता नसल्याने राजकीय वर्तुळात उत्सुकता कायम आहे.

दरम्यान, ‘बिग बॉस मराठी’मधून चर्चेत आलेले अभिजित बिचुकले यांनीही उमेदवारी अर्ज दाखल केल्याने या निवडणुकीत रंगत वाढली आहे. त्यांच्यासह विविध पक्ष व अपक्ष उमेदवारांनीही रिंगणात उडी घेतली आहे.

इतर उमेदवारांमध्ये हिंदुस्तान जनता पार्टीचे सतीश कदम, न्यू राष्ट्रीय समाज पार्टीचे राघू घुटूकडे, राष्ट्रीय किसान बहुजन पक्षाचे अरुण निटुरे यांचा समावेश आहे. याशिवाय शरद भिसे, संदीप खरात, गजानन गवळी, त्रिशला कांबळे, दिलीप अलोनी, दत्तात्रय बेदरे, रज्जाक उर्फ अब्दुलरौफ मुलानी, मिथुन अटोळे, संकेत गावडे, दादा थोरात, अभिजित कांबळे, विलास होळकर आणि अनिल तुपे यांनी अपक्ष उमेदवारी अर्ज भरले आहेत.

पोटनिवडणूक बिनविरोध व्हावी यासाठी राष्ट्रवादी काँग्रेस (अजित पवार गट) कडून प्रयत्न सुरू असल्याची माहिती समोर येत आहे.

प्रशासकीय तयारी सुरू
निवडणुकीच्या पार्श्वभूमीवर प्रशासनानेही तयारी सुरू केली आहे. जनरल निरीक्षक विद्यानंद सिंग आणि पोलीस निरीक्षक एन. कोलनची यांची नियुक्ती करण्यात आली असून त्यांनी विविध मतदान केंद्रांना भेट देत पाहणी केली आहे.

अभिजित बिचुकले कायम चर्चेत
विविध निवडणुकांमध्ये सातत्याने उमेदवारी अर्ज दाखल करणारे अभिजित बिचुकले हे कायम चर्चेत असतात. २०१९ च्या विधानसभा निवडणुकीत त्यांनी वरळी मतदारसंघातून आदित्य ठाकरे यांच्या विरोधात निवडणूक लढवली होती. तसेच सातारा आणि कसबा मतदारसंघातूनही त्यांनी निवडणुका लढवल्या आहेत. २०१९ आणि २०२४ च्या लोकसभा निवडणुकांमध्येही त्यांनी सातारा मतदारसंघातून अपक्ष उमेदवार म्हणून नशीब आजमावले होते.