Mumbai : गोरेगाव-मागाठाणे रोड 10 मिनिटांत प्रवास शक्य! कोस्टल रोड-लिंक रोड जोडणारा 5.5 किमीचा नवा मार्ग

Mumbai : शहरात सुरू असलेल्या गोरेगाव मुलुंड लिंक रोड प्रकल्पाची डेडलाइन नुतकीच वाढवण्यात आली. याचं कारण म्हणजे वर्सोवा-भाईंदर कोस्टल रोडशी जोडणी देण्यास मंजुरी देण्यात आली. यासाठी गोरेगाव ते मागाठाणे दरम्यान 5.5 किमी लांब हायस्पीड कॉरिडोर उभारण्याचा प्रस्ताव महापालिकेने मांडला आहे. या कॉरिडोरमुळे या दोन्ही प्रकल्पांदरम्यान कनेकटीव्हीटी निर्माण होणार आहे.

प्रवासाचा वेळ केवळ 10 मिनिटांवर
गोरेगावमधील फिल्म सिटीपासून ते बोरिवली जवळील मागाठाणेपर्यंत हा प्रकल्प उभारण्यात येणार आहे. हा मार्ग पश्चि द्रुतगती मार्गाला समांतर असणार आहे. यामुळे मुंबईला पूर्व व पश्चिम उपनगरांशी सहजपणे जोडण्यात येणार आहे. संपूर्णपणे नवीन बांधलेल्या या प्रकल्पामुळे कोस्टल रोड ते लिंक रोड जोडणी मिळणार आहे. यामुळे गोरेगाव ते मागाठाणेदरम्यान अंतर 10 मिनिटांवर येणार आहे. हा मार्ग कोस्टल रोड आणि लिंक रोडमधील एक थेट दुवा बनणार आहे.

वर्सोवा-भाईंदर कोस्टल रोडचा एका भाग पूर्व दिशेकडून विस्तारून तो मागाठाणे येथील मार्गाला जोडला जाईल. यामुळे मार्गावर थेट प्रवेश मिळवणं शक्य होणार आहे. तिथून वाहनचालक थेट पुढे लिंक रोडवर प्रवास करत मुंलुंड पर्यंत पोहचू शकतात. तसेच, नव्या तयार होणाऱ्या उड्डाणपुलामुळे थेट नवी मुंबईतील ऐरोलीपर्यंत पोहोचणे ही शक्य होणार आहे. महापालिकेच्या एका अधिकाऱ्यांनी इंडियन एक्सप्रेसशी बोलताना अशी माहिती दिली की, हा मार्ग उभारण्यामागील हेतू मुंबईतील सर्व मुख्य उन्नत मार्ग आणि हाय स्पीड कॉरिडोर जोडणे आहे. तसेच, पश्चिम द्रुतगती मार्गावर झालेली वाहतूक कोंडीवर हा एक महत्त्वाचा उपाय ठरणार आहे.

कधी होणार पूर्ण?
सध्या प्रवासात महामार्ग आणि छोट्या मार्गावर प्रवास करत वाहतूक कोंडीच्या वेळी तब्बल 60 मिनिटांचा वेळ लागायचा. हा प्रवासाचा वेळ आता फक्त 10 मिनिटांवर येणार आहे. सध्या या प्रस्तावित मार्गावर काही अतिक्रमणे आणि अडथळे हटवावे लागतील. त्यानंतर अंदाजित खर्च, प्रकल्प अहवाल सादर करून निविदा काढण्यात येतील. त्यानंतर बांधकामाला सुरूवात करून 2029पर्यंत हा संपूर्ण मार्ग सुरू करण्याचं महापालिकेचं उद्दिष्ट आहे.

मुंबईतील कोस्टल रोडच्या दुसऱ्या टप्प्यात सध्या वर्सोवा ते भाईंदर मार्ग उभारण्याचं काम सुरू आहे. हा रस्ता 25 किमी लांब असून मुंबईच्या पश्चिम उपनगरात उभारला जात आहे. पहिल्या टप्प्यात मरिन ड्राइव्ह ते वरळी सी लिंकपर्यंतचा कोस्टल रोड वांद्रेपर्यंत विस्तारला आहे. हे दोन्ही मार्ग तयार करताच वांद्रे ते वर्सोवा थेट जोडणी मिळणार आहे.