Pune : दररोज सव्वा कोटींचा दंड भरा!” पुणे रिंगरोडच्या कंत्राटदाराला MSRDCची ताकीद, कामाचा वेग वाढवण्याचे आदेश

Pune : पश्चिम भागातील रिंग रोडच्या कामाला गती येत असताना पूर्व भागातील चाकण आणि तळेगाव भागातील कामाला तीन महिने विलंब झाला आहे. त्यामुळे दोन्ही पॅकेजच्या कामाचा कंत्राट घेतलेल्या संबंधित एका बड्या कंपनीला महाराष्ट्र राज्य रस्ते विकास महामंडळाने (एमएसआरडीसी) नोटीस जारी केली आहे. दररोज सव्वा कोटी रुपये दंडाची कारवाई का करण्यात येऊ नये, अशी नोटीस बजावण्यात आली आहे. त्यावर कंपनीकडून खुलासा मागविण्यात आला आहे. त्यामुळे कंपनीचे धाबे दणाणले आहेत.

पूर्व भागांत चार टप्प्यांत काम सुरू
राज्य रस्ते विकास महामंडळाच्यावतीने पूर्व आणि पश्चिम अशा दोन टप्प्यांत रिंग रोडचे काम वेगाने सुरू आहे. पश्चिम भागातील रिंग रोडचे पाच, तर पूर्व भागात चार टप्प्यांत काम सुरू आहे. त्यापैकी रहाटणी जवळील कल्याण येथे दुहेरी बोगद्याचे काम वेगाने सुरू आहे. दोन्ही बाजूने सुमारे अडीच किलोमीटर अंतरापर्यंतचे काम पूर्ण झाले आहे. मुंबईहून साताऱ्याकडे जाताना बोगद्यात प्रवेश करताना १४११ मीटर; तर कल्याणच्या बाजूला बाहेर पडतानाच्या बोगद्याचे १४२८ मीटर इतके काम पूर्ण झाले आहे. हा बोगदा चौथ्या टप्प्यांतंर्गत करण्यात येत आहे.

बोगद्याची खोदाईचे काम काही प्रमाणात पूर्ण झाल्याने बोगद्याची आतील वरील बाजूस शॉर्ट किट मारण्याचे काम पूर्ण झाले आहे. उर्वरित कामाच्या खोदाईचे काम सुरू आहे. त्यामुळे पश्चिम भागातील रिंगरोडचे २५ टक्के काम पूर्ण झाले आहे, तर पूर्व भागातील काम साधारणतः १२ ते १५ टक्के पूर्ण झाले आहे. पश्चिमेच्या तुलनेत पूर्वेकडील काम अतिशय संथ गतीने सुरू आहे.

पश्चिमेकडील दुसरा, तिसरा, चौथा टप्प्याचे काम वेगाने सुरू आहे, तर पूर्वेकडील चौथ्या आणि दुसऱ्या टप्प्याच्या कामाला गती आहे. नोटीस जारी केलेल्या कंपनीने पूर्वेकडील पहिला आणि तिसरा टप्पा आणि पश्चिमेकडील पहिल्या टप्प्याच्या कामाचे कंत्राट घेतले आहे. दोन्हीकडील कामांना गती देण्याची सूचना महामंडळाने केली आहे.

विलंब होतोय, दंड का नको?
पूर्व भागात चार टप्प्यांत काम होणार आहे. त्यापैकी पहिला आणि तिसऱ्या या टप्प्यातील म्हणजेच चाकण आणि तळेगाव येथील काम अत्यंत हळू सुरू आहे. त्यामुळे या कामास विलंब होत असल्याकडे कंपनीचे लक्ष वेधून रस्ते विकास महामंडळाने नोटीस बजावली आहे. सद्यस्थितीतील कामाची प्रगती पाहता तीन महिने कामास विलंब झाला आहे. त्यामुळे या कामाची गती वाढवावी, अशी सूचना करण्यात आली आहे; तसेच कामास विलंब होत असल्याने दररोज सव्वा कोटी रुपयांचा दंड का आकारण्यात येऊ नये अशी विचारणा करणारी नोटीस जारी केली आहे. त्याबाबत कंपनीकडून खुलासा मागविण्यात आला आहे.