अहिल्यानगर: आंतरजातीय विवाहाला घरच्यांचा विरोध होईल या टोकाच्या भीतीतून प्रेमीयुगुलाचा विहिरीत उडी मारून करुण अंत

अहिल्यानगर:  कर्जत तालुक्यातील एका गावातील प्रेमीयुगुलाने विहिरीत उडी घेऊन आत्महत्या केल्याचा प्रकार बुधवारी सकाळी समोर आला. या घटनेतील तरुण-तरुणी कर्जत येथील महाविद्यालयात शिकत होते. १८ वर्षीय मुलगी बारावीला, तर २१ वर्षीय मुलगा हा पदवीच्या अंतिम वर्षाला होता. त्याच्यात मागील दोन वर्षांपासून प्रेमसंबंध होते. मात्र, घरचे आंतरजातीय विवाहाला संमती देणार नाहीत, या नैराश्यातून त्यांनी हे टोकाचे पाऊल उचलल्याचा प्राथमिक अंदाज आहे.

मंगळवारी दुपारी ४ वाजता खुरंगे फाटा ते खुरंगेवाडीदरम्यान असलेल्या विष्णू गणपत शिंगाडे यांच्या शेतातील विहिरीत त्यांचा मृतदेह आढळून आला. दोघेही उशिरापर्यंत घरी न आल्याने ते कुठेतरी निघून गेल्याचा कुटुंबीयांचा समज झाला. त्यामुळे रात्री विशेष शोध घेतला नाही. बुधवारी सकाळी साडेनऊ वाजता विहिरीत मुलीचा मृतदेह तरंगत असल्याचे निदर्शनास आल्यानंतर राजू पोपट जगधने यांनी मिरजगात पोलिसांना माहिती दिली. त्यानंतर पोलिस तातडीने घटनास्थळी दाखल झाले.

विहिरीजवळ मुलीचे दप्तर व चपला आढळून आल्या. मुलीचा मृतदेह शवविच्छेदनासाठी मिरजगाव प्राथमिक आरोग्य केंद्रात नेला. मात्र, मुलगा सापडेपर्यंत शवविच्छेदन न करण्याची मागणी नातेवाईकांनी केल्याने काही काळ तणाव निर्माण झाला होता. त्यानंतर पोलिसांनी ट्रॅक्टर व विद्युत पंपाच्या साहाय्याने आठ तास पाणी उपसल्यानंतर रात्री साडेआठ वाजता गाळात रुतलेल्या अवस्थेत मुलाचा मृतदेह आढळून आला.