Maharashtra Politics : भाजपचं सरकार आणण्यात शरद पवारांचा सिंहाचा नाही तर हत्तीचा वाटा, केंद्रीय मंत्र्यांचा खळबळजनक दावा

Bulldana : शिवसेना शिंदे गटाचे नेते आणि केंद्रीय आरोग्य राज्यमंत्री प्रतापराव जाधव यांनी शरद पवारांबाबत मोठं विधान केले आहे. त्यांच्या विधानाने राजकीय वर्तुळात चर्चांना उधाण आले आहे. राज्यात भाजपचं सरकार आणण्यात शरद पवारांचा सिंहाचा नाही तर हत्तीचा वाटा, असा खळबळजनक दावा प्रतापराव जाधव यांनी केला आहे. 'आता या देशात मी कसा मोठा विरोधक आहे हे दाखविण्याचा शरद पवारांचा प्रयत्न सुरू.', असा टोला देखील त्यांनी लगावला. बुलडाण्यात माध्यमांशी संवाद साधताना त्यांनी शरद पवार यांच्याबाबत हे वक्तव्य केले.

'२०१४ साली राज्यात भाजपचे सरकार आणण्यासाठी शरद पवारसाहेबांचा सिंहाचा नाही तर हत्तीचा वाटा आहे. वेळोवेळी त्यांनी भाजपला मदत केली आहे. मात्र आता त्यांना एवढा भाजपचा तिटकारा का...?' असा सवाल मंत्री प्रतापराव जाधव यांनी केला आहे. तर, 'देशात सर्वात मोठा विरोधक मी व माझा पक्ष हे दाखवण्यासाठी आणि आपल्या पक्षाचे अस्तित्व टिकवण्यासाठी ते प्रयत्न करत आहेत.', असा टोला देखील केंद्रीय आरोग्य राज्यमंत्री प्रतापराव जाधव यांनी शरद पवारांना लगावला आहे.

Amravati Corona : अमरावतीत कोरोनाचा शिरकाव; ९ जणांचा अहवाल पॉझिटिव्ह

त्यांनी यावेळी काँग्रेसवर देखील जोरदार टीका केली. 'राज्यातील सर्वात मोठा विरोधी पक्ष असलेला काँग्रेस पक्षाच्या प्रदेशाध्यक्षांना जर दारूचे भाव कमी पाहिजे असतील तर मी सरकारला त्यांच निवेदन देईल. हिंदू धर्मात कोणी कुठे कशी पूजा करावी हा ज्याचा त्याचा प्रश्न आहे. त्यामुळे रायगडमध्ये काही पूजा झाली असेल तर त्यात गैर काय?', असे देखील मत प्रतापराव जाधव यांनी व्यक्त केले.