पुणे: छत्रपती शिवरायांचा अपमान केल्यास सोडणार नाही; राष्ट्रीय स्वयंसेवक संघाच्या बॅनर्सवर शिवरायांचे फोटो लावण्यावरून रुपाली ठोंबरे केंद्रीय मंत्री मुरलीधर मोहोळांवर भडकल्या!

 

पुणे: दसरा सण आणि राष्ट्रीय स्वयंसेवक संघाच्या (RSS) स्थापनेच्या निमित्ताने  देशभरात विविध कार्यक्रमांचे आयोजन करण्यात आले होते. यादरम्यान राष्ट्रीय स्वयंसेवक संघाच्या स्वयंसेवकांचे पथसंचलन आणि अन्य कार्यक्रमांच्या प्रचारासाठी भाजपच्या वतीने विविध ठिकाणी बॅनर्सबाजी करण्यात आली होती. पुण्यातही केंद्रीय सहकार आणि नागरी उड्डयन राज्यमंत्री मुरलीधर मोहोळ यांच्या वतीने लावण्यात आलेल्या बॅनर्सवर छत्रपती शिवाजी महाराजांच्या फोटोशेजारी डॉ. हेडगेवार आणि गोळवलकर गुरुजींचे फोटो लावण्यात आले होते. या प्रकारावर राष्ट्रवादी काँग्रेस पार्टी (अजित पवार गट) पक्षाच्या नेत्या रुपाली पाटील ठोंबरे यांनी अत्यंत तीव्र आक्षेप घेत केंद्रीय राज्यमंत्री मुरलीधर मोहोळ यांना थेट शब्दांत मोठा इशारा दिला आहे.

रुपाली ठोंबरे यांचा मुरलीधर मोहोळांवर घणाघात:

या प्रकरणावर संताप व्यक्त करताना राष्ट्रवादीच्या नेत्या रुपाली पाटील ठोंबरे म्हणाल्या की, "खासदार तथा केंद्रीय राज्यमंत्री मुरलीधर मोहोळ यांचा मी जाहीर निषेध करते. छत्रपती शिवाजी महाराज यांचा फोटो हेडगेवार आणि गोळवलकर यांच्यासोबत अशा प्रकारे एकाच पातळीवर लावण्याचा कोणताही अधिकार कोणालाही नाही. छत्रपती शिवाजी महाराज हे महाराष्ट्राचे आराध्य दैवत आहेत आणि त्यांचा अशा प्रकारे अवमान करण्याचा किंवा वापरण्याचा अधिकार कोणीही दिलेला नाही. तुम्ही सातत्याने असे प्रकार का करत आहात? जर तुम्ही छत्रपती शिवाजी महाराज यांचा असाच अवमान करत राहिलात, तर आम्ही तुम्हाला अजिबात सोडणार नाही. भाजपच्या प्रतिनिधींमध्ये थोडा जरी मेंदू असेल आणि तुम्ही सुशिक्षित असाल, तर ताी जाणीव ठेवून यापुढे शिवरायांचा अवमान होणार नाही याची सक्त काळजी घ्या. जर अशी काळजी घेतली नाही, तर आम्हाला येत्या काळात अत्यंत आक्रमक मार्गाने उत्तर द्यावे लागेल."

महायुतीमधील अंतर्गत वाद आणि दुजाभावावर रोखठोक भाष्य:

यावेळी बोलताना रुपाली ठोंबरे यांनी महायुतीमधील मित्रपक्षांकडून मिळत असलेल्या दुजाभावावर आणि वागणुकीवर देखील उघडपणे भाष्य केले. त्या म्हणाल्या की, महायुतीमध्ये राष्ट्रवादी काँग्रेस पक्ष सामील असल्यापासून भारतीय जनता पक्षाकडून आमच्या पक्षाला आणि नेत्यांना जी दुजाभावाची वागणुकी दिली जात आहे, ती आता लपून राहिलेली नाही. भाजपकडून सातत्याने मिळणाऱ्या या प्रकारच्या वागणुकीबद्दल आम्ही आमचे पक्षश्रेष्ठी सुनेत्रा पवार आणि पार्थ पवार यांच्याकडे वेळोवेळी तक्रार केली आहे.

स्थानिक राजकारणाचा संदर्भ देत त्यांनी सोमेश्वर सहकारी साखर कारखाना निवडणुकीचा दाखला दिला. अजित पवार यांनी ज्या व्यक्तीवर तब्बल तेरा वर्षे सलग विश्वास टाकला आणि कारखाना चालवण्यासाठी दिला, तीच व्यक्ती आता वेगळे पॅनल तयार करून उभी राहत आहे आणि अशा बंडखोरांना जर भाजप उघडपणे मदत करत असेल, तर या सर्व गोष्टींना सामोरे जात सुजाण जनतेने त्यांना त्यांची योग्य लायकी दाखवून दिली आहे, असेही त्यांनी ठणकावून सांगितले. तसेच पदवीधर व शिक्षक मतदारसंघाच्या निवडणुकांमध्ये मित्रपक्षांना विश्वासात न घेता परस्पर उमेदवार लादण्याच्या पद्धतीवरही त्यांनी तीव्र नाराजी व्यक्त केली आहे.