जनतेच्या हितासाठी आम्ही प्रत्यक्ष मैदानात काम करतो; पण ज्ञानेश कुमारांच्या कृपेने दुसरेच लोक निवडून येतात!" - शर्मिला ठाकरे यांचा टोला

पुणे/जेजुरी: महाराष्ट्र नवनिर्माण सेनेचे (मनसे) अध्यक्ष राज ठाकरे यांच्या पत्नी आणि मनसे नेत्या शर्मिला ठाकरे यांनी मुख्य निवडणूक आयुक्त ज्ञानेश कुमार यांच्यावर आणि निवडणूक प्रक्रियेवर अत्यंत तिखट शब्दांत टीका केली आहे. पुणे जिल्ह्यातील प्रसिद्ध ती

 

र्थक्षेत्र जेजुरी येथे मनसे कार्यकर्त्याच्या एका कार्यक्रमासाठी उपस्थित राहिल्या असताना शर्मिला ठाकरे यांनी "कामं आपण प्रत्यक्ष मैदानात उतरून करतो, परंतु ज्ञानेश कुमारांच्या आशीर्वादाने व कृपेने भलतेच लोक निवडून येतात," असा खळबळजनक आणि राजकीय टोला लगावला आहे.

निवडणूक प्रक्रियेच्या पारदर्शकतेवर आणि ईव्हीएमसह मतदार याद्यांमधील कथित गोंधळावर विरोधकांकडून सातत्याने प्रश्न उपस्थित केले जात आहेत. या पार्श्वभूमीवर जेजुरी येथे उपस्थितांशी संवाद साधताना शर्मिला ठाकरे म्हणाल्या की, मनसेचे कार्यकर्ते व लोकप्रतिनिधी जनतेच्या दैनंदिन प्रश्नांवर आणि हितासाठी अहोरात्र काम करतात. मात्र, प्रत्यक्ष निवडणुकीच्या निकालात भलतेच चित्र समोर येते. त्यामुळे कार्यकर्त्यांना उद्देशून त्यांनी आवाहन केले की, "खरे काम करणाऱ्या आणि राबणाऱ्या माणसांसाठी आज तुम्ही जेजुरीच्या खंडेरायाला साकडे घाला आणि नवस बोला."

दुष्काळाच्या तीव्र संकटावर चिंता व्यक्त:

राजकीय टोलेबाजीसोबतच शर्मिला ठाकरे यांनी ग्रामीण भागातील दुष्काळी परिस्थितीवर गंभीर चिंता व्यक्त केली. त्या म्हणाल्या की, "दौऱ्यादरम्यान रस्त्याच्या दुतर्फा पाहिले असता पिण्याच्या पाण्याची प्रचंड टंचाई असून शेतातील उभी पिके पाण्याअभावी पूर्णपणे जळून खाक झाली आहेत. शेतकऱ्यांच्या उसाला योग्य भाव मिळत नाहीये आणि जनावरांच्या चाऱ्याचा गंभीर प्रश्न निर्माण झाला आहे. दुष्काळाशी झुंजणाऱ्या बळीराजाला दिलासा मिळावा, यासाठी सर्व पिकांचे त्वरित पंचनामे होऊन भरीव मदत मिळणे गरजेचे आहे. यासंदर्भात मी स्वतः मनसे अध्यक्ष राज ठाकरे यांच्याशी सविस्तर चर्चा करणार आहे."

शर्मिला ठाकरे यांच्या या वक्तव्यामुळे आणि थेट मुख्य निवडणूक आयुक्तांचे नाव घेऊन केलेल्या टीकेमुळे राजकीय वर्तुळात मोठी चर्चा रंगली असून, विरोधक आणि निवडणूक आयोगामधील वाद आणखी चिघळण्याची शक्यता वर्तवली जात आहे.