रेंज रोव्हर, BMW, डिफेंडर अन्..; मराठी दिग्दर्शकानं एकाच दिवशी खरेदी केल्या 4 अत्यंत महागड्या गाड्या

बॉलिवूड किंवा साऊथ फिल्म इंडस्ट्रीतील कलाकारांनी एखादी महागडी गाडी विकत घेतली, की चाहत्यांमध्ये आणि सोशल मीडियावर त्याची चर्चा हमखास होते. परंतु यावेळी एका मराठी दिग्दर्शकाची सोशल मीडियावर तुफान चर्चा रंगली आहे. कारण या दिग्दर्शकाने एकाच दिवशी चार महागड्या आणि आलिशान गाड्या विकत घेतल्या आहेत. शिवजयंतीच्या मुहूर्तावर या दिग्दर्शकाने त्याच्या कलेक्शनमध्ये चार मोठ्या ब्रँडच्या गाड्यांचा समावेश केला आहे. या दिग्दर्शकाचं नाव आहे संतोष डावखर. ‘गोंधळ’ या चित्रपटातून संतोष यांना चांगलंच यश मिळालं असून, त्याच यशामुळे एकाच दिवशी चार महागड्या गाड्या विकत घेतल्याची जोरदार चर्चा आहे. विशेष म्हणजे या चित्रपटाची ओटीटी प्लॅटफॉर्मशी तगडी डील झाली असावी, अशीही शक्यता वर्तवण्यात येत आहे.

सध्या सोशल मीडियावर संतोष डावखर यांचे या आलिशान गाड्यांसोबतचे फोटो तुफान व्हायरल होत आहेत. या गाड्यांमध्ये रेंज रोव्हर, डिफेंडर, बीएमडब्ल्यू आणि बीव्हायडी सिलायन यांचा समावेश आहे. या चारच्या चार गाड्यांची किंमत कोट्यवधींमध्ये आहे. परंतु त्यांच्या एकूण खरेदी किंमतीचा नेमका आकडा अद्याप समजू शकलेला नाही.

पारंपरिक श्रद्धा, लोककला आणि आधुनिक सिनेमॅटिक मांडणीचा अप्रतिम संगम राष्ट्रीय पुरस्कार विजेते दिग्दर्शक संतोष डावखर यांच्या ‘गोंधळ’ या चित्रपटात दिसून येतो. नवरा-नवरीच्या आयुष्यातील विघ्नं दूर करण्यासाठी साजऱ्या होणाऱ्या गोंधळाच्या माध्यमातून उलगडणारी ही कथा काहीतरी अनपेक्षित आणि रहस्यमय वळण घेऊन येते. या चित्रपटात किशोर कदम, इशिता देशमुख, योगेश सोहोनी, निषाद भोईर, अनुज प्रभू, सुरेश विश्वकर्मा, माधवी जुवेकर, ऐश्वर्या शिंदे, कैलाश वाघमारे, प्रभाकर मठपती, विठ्ठल काळे, प्रवीण डाळींबकर, शरद जाधव, पूनम पाटील आणि ध्रुव ठोके हे नामवंत कलाकारांच्या भूमिका आहेत.

मराठी संस्कृतीचा अस्सल गंध, लोककलेचा थाट आणि आधुनिक जगण्याच्या नवनव्या छटा मांडणारा ‘गोंधळ’ हा चित्रपट आंतरराष्ट्रीय पातळीवरही आपली ताकद दाखवण्यात यशस्वी ठरला आहे. गोव्यात झालेल्या भारतीय सरकारच्या 56व्या इंटरनॅशनल फिल्म फेस्टिव्हल ऑफ इंडिया (इफ्फी)मध्ये ‘गोंधळ’ने ‘सिल्व्हर पिकॅाक इंटरनॅशनल सेक्शन’मध्ये सर्वोत्कृष्ट दिग्दर्शकाचा पुरस्कार पटकावला आहे. गेल्या 56 वर्षांत पहिल्यांदाच मराठी चित्रपटाला ‘सर्वोत्कृष्ट दिग्दर्शक’चा अवॉर्ड मिळाल्याने हा विजय अधिकच ऐतिहासिक ठरला आहे.