आदिवासी वाड्या थेट शहराशी जोडणार! पेण-बोरगाव-कासमाळ रस्त्याच्या काँक्रीटीकरणाला प्रत्यक्षात सुरुवात, दोन किलोमीटर मार्गासाठी २.८० कोटींचा निधी मंजूर

पेण: पेण शहरापासून अवघ्या चार किलोमीटर अंतरावर असलेल्या बोरगाव-कासमाळ रस्त्याच्या काँक्रीटीकरणाचे काम अखेर प्रत्यक्षात सुरू करण्यात आले आहे. या विकासकामामुळे परिसरातील दुर्गम आदिवासी वाड्या थेट मुख्य शहराशी जोडल्या जाणार असून, येथील प्रवाशांचा व ग्रामस्थांचा प्रवास अधिक सुकर होणार आहे. मुख्यमंत्री ग्रामसडक योजनेअंतर्गत या महत्त्वपूर्ण रस्त्यासाठी निधी उपलब्ध करून देण्यात आला असून, केवळ दोन किलोमीटरच्या पक्क्या मार्गासाठी तब्बल दोन कोटी ८० लाख रुपयांचा भरीव निधी खर्च केला जात आहे.

माहितीनुसार, या रस्त्याची अवस्था पूर्वी बऱ्याच प्रमाणात खराब झाली होती, ज्यामुळे पावसाळ्यात ग्रामस्थांना आणि विशेषतः शाळकरी मुलांना व नागरिकांना प्रचंड हाल सहन करावे लागत होते. या समस्येची गंभीर दखल घेत भाजपचे युवा नेते ललित पाटील यांच्या विशेष प्रयत्नातून व पाठपुराव्यातून या रस्त्याच्या काँक्रीटीकरणाचा मार्ग मोकळा झाला आहे. मुख्यमंत्री ग्रामसडक योजनेतून मिळणाऱ्या या निधीमुळे आता दर्जेदार आणि दळणवळणासाठी अत्यंत मजबूत असा काँक्रीटचा रस्ता तयार होणार आहे. रस्ता निर्मितीचे काम सुरू झाल्याने स्थानिक ग्रामस्थांनी व नागरिकांनी समाधान व्यक्त केले असून, या प्रकल्पामुळे परिसराचा सामाजिक व आर्थिक विकास साधण्यास मदत होईल असा विश्वास व्यक्त केला जात आहे.