वाघीण पाहण्याच्या मोहात वन अधिकाऱ्याचा प्रताप; ताफा तासभर थांबवल्याने उपचारास उशीर होऊन जेरबंद वाघिणीचा मृत्यू!

पथ्रोट (जि. अमरावती): अमरावती जिल्ह्यातून एक अत्यंत संतापजनक आणि वन्यजीव प्रेमींना हळहळ लावणारी घटना समोर आली आहे. गेल्या बावीस दिवसांच्या कालावधीत परिसरात तब्बल चार नरबळी घेत तसेच मोठ्या प्रमाणावर पशुधन फस्त करून जंगलात व परिसरात मोठी दहशत निर्माण करणाऱ्या एका कुख्यात वाघिणी अखेर वनविभागाच्या टीमने सोमवारी यशस्वीरीत्या जेरबंद केले होते. मात्र, या वाघिणीला पकडल्यानंतर उपचारासाठी घेऊन जात असताना वनविभागाच्या वरिष्ठ अधिकाऱ्याच्या अनाकलनीय आणि गैरजबाबदार वागणुकीमुळे तिचा उपचारादरम्यान दुर्दैवी मृत्यू झाल्याचा गंभीर प्रकार उघडकीस आला आहे.

मिळालेल्या सविस्तर माहितीनुसार, परिसरामध्ये तीव्र दहशत निर्माण करणाऱ्या या वाघिणीला बेशुद्ध करून जेरबंद केल्यानंतर तिला तातडीने वैद्यकीय उपचारासाठी व सुरक्षित स्थयी हलवणे गरजेचे होते. मात्र, प्रत्यक्षदर्शी आणि सूत्रांकडून मिळालेल्या माहितीनुसार, वनविभागातील एका वरिष्ठ अधिकाऱ्याला ती वाघीण स्वतःच्या डोळ्यांनी पाहण्याचा व तिचा जवळून अनुभव घेण्याचा तीव्र मोह झाला. या अधिकाऱ्याच्या अट्टाहासामुळे आणि हट्टामुळे वाघिणीला घेऊन जाणारा ताफा तब्बल एक तासभर (तासभर विनाकारण) एकाच ठिकाणी थांबवून ठेवण्यात आला.

उपचारात झालेला उशीर जिवावर बेतला: वन्यजीव तज्ज्ञांच्या मते, बेशुद्ध केलेल्या (Tranquilized) वन्यप्राण्याला लवकरात लवकर योग्य वैद्यकीय उपचार आणि ऑक्सिजन पुरवठा मिळणे अत्यंत आवश्यक असते. अशा संवेदनशील स्थितीत तासभर ताफा थांबवून ठेवल्यामुळे उपचारात मोठा विलंब झाला. या गंभीर दिरंगाईमुळे वाघिणीची प्रकृती अत्यंत खालावली आणि उपचारादरम्यान तिचा मृत्यू झाला.

एका जबाबदार वरिष्ठ अधिकाऱ्याच्या केवळ 'वाघीण पाहण्याच्या मोहामुळे' आणि निष्काळजीपणामुळे एका वन्यप्राण्याला जीव गमवावा लागल्याने वन्यजीवप्रेमी आणि नागरिकांमधून तीव्र संताप व्यक्त होत आहे. या संपूर्ण प्रकरणाची सखोल चौकशी करून दोषी अधिकाऱ्यावर कठोर कारवाई करावी, अशी मागणी आता जोर धरू लागली आहे.