पुणे: अभ्यासाचा आणि परीक्षेचा प्रचंड ताण; बारामतीत १६ वर्षीय विद्यार्थ्याचे टोकाचे पाऊल, शैक्षणिक वर्तुळात मोठी हळहळ!

पुणे: बारामती शहरातील भिगवण रोड परिसरातील एका निवासी इमारतीमधील १६ वर्षीय विद्यार्थिनीने शुक्रवारी पहाटे इमारतीच्या चौथ्या मजल्यावरील टेरेसवरून उडी घेतली. या धक्कादायक घटनेत ती गंभीर जखमी झाली आणि तातडीने वैद्यकीय महाविद्यालयात दाखल करण्यात आली. परंतु, उपचारादरम्यान पहाटे सुमारे ५ वाजता तिचा मृत्यू झाला.

पोलिसांनी दिलेल्या माहितीनुसार, विद्यार्थिनी बारामती येथील एका महाविद्यालयात इयत्ता अकरावी सायन्समध्ये शिक्षण घेत होती आणि तिच्या परीक्षा सुरू होत्या. तिच्या आई-वडिलांनी पोलिसांना दिलेल्या प्राथमिक माहितीनुसार, मागील काही दिवसांपासून ती अभ्यास व परीक्षेच्या ताणवाखाली होती. आई-वडिलांकडे ती याबाबत बोलत होती, असे त्यांनी सांगितले आहे.

गुरुवारी रात्री ती १२.३० वाजेपर्यंत अभ्यासाच्या ताणाखाली होती आणि त्यानंतर टेरेसवर जाऊन येत असल्याचे सांगून ती इमारतीच्या गच्चीवर गेली. बराच वेळ होऊनही ती खाली न आल्याने तिचे वडील तिला पाहण्यासाठी वर गेले. वडिलांनी तिला आवाज दिला असता ती टेरेसच्या कड्यावर खाली पाय सोडून बसलेली होती. अचानक तिने खाली उडी मारल्याचे प्राथमिक चौकशीतून समोर आले आहे. विद्यार्थिनी समोरील भागात खाली पडल्याने गंभीर जखमी झाली. तिच्या आई-वडिलांच्या व शेजारी यांच्या मदतीने तिला तातडीने रुग्णालयात दाखल करण्यात आले. पण, उपचारादरम्यान तिची प्रकृती गंभीर झाल्यामुळे तिचा दुर्दैवी मृत्यू झाला.

पालकांनी सद्यस्थितीत कोणत्याही व्यक्तीविरुद्ध तक्रार किंवा संशय व्यक्त केला नाही. पण अभ्यास व परीक्षेच्या ताणामुळे आत्महत्येची शक्यता वर्तवली जात आहे, परंतु नेमके कारण अद्याप निश्चित झालेले नाही. विद्यार्थिनीकडे वैयक्तिक मोबाइल नव्हता आणि ती आई-वडिलांच्या मोबाईलचा वापर करत होती. या घटनेमागील नेमके कारण शोधण्यासाठी बारामती शहर पोलिसांकडून सखोल चौकशी सुरू आहे, असे पोलिस निरीक्षक श्रीशैल चिवडशेट्टी यांनी सांगितले.