चंदीगढ: संगीत जगतातून अत्यंत धक्कादायक बातमी; ३५ वर्षीय प्रसिद्ध पंजाबी गायक बलजीत सिंग याचा राहत्या घरी मृतदेह आढळल्याने मोठी खळबळ!

चंदीगढ: पंजाबी सिनेइंडस्ट्रीतून एक धक्कादायक बातमी समोर येत आहे. एका प्रसिद्ध सिंगरचा मृतदेह त्याच्या घरात आढळल्याने सिनेसृष्टी हादरली आहे. ३५ वर्षीय सिंगर आणि गीतकार बलजीत सिंह त्याच्या लुधियानामधील राहत्या घरी मृतावस्थेत आढळला. बलजीत सिंह लुधियानामधील त्याच्या घरी एकटाच वास्तव्यास होता. गेल्या ४-५ दिवसांपासून कुटुंबीयांशी त्याचा संपर्क होऊ शकला नव्हता. गुरुवारी (३ सप्टेंबर) बलजीतच्या घरातून दुर्गंधी येऊ लागल्याने शेजाऱ्यांनी पोलिसांत तक्रार दिली. पोलीस जेव्हा घटनास्थळी पोहोचले तेव्हा बलजीत सिंहच्या घरी त्याचा मृतदेह आढळला. बरेच दिवस झाल्याने मृतदेह कुजलेल्या अवस्थेत होता, अशी माहिती मिळत आहे.

रिपोर्टनुसार, पोलीस जेव्हा बलजीतच्या घरी पोहोचले तेव्हा खूप भयानक परिस्थिती त्यांना दिसली. बलजीतचा मृतदेह बेडवर आढळला. त्यांच्या संपूर्ण घरात रक्ताचे डाग दिसून आले. त्यामुळे त्याची हत्या झाल्याचा संशय सुरुवातीला व्यक्त करण्यात आला. पण, मृतदेहाच्या पोस्टमार्टम रिपोर्टने या प्रकरणाला वेगळं वळण मिळालं. पोलिसांनी दिलेल्या माहितीनुसार, पोस्टमार्टम रिपोर्टमध्ये बलजीत सिंहचा मृत्यू हा हार्ट अटॅकने झाल्याचं स्पष्ट करण्यात आलं आहे. त्यामुळे सिंगरच्या घरात आढळलेले रक्ताचे डाग आणि इतर संशयास्पद गोष्टींबाबत प्रश्नचिन्ह निर्माण झाले आहे.

याप्रकरणी पोलीस तपास करत आहेत. घराच्या आसपासच्या परिसारातील सीसीटीव्ही फुटेजचा पोलीस तपास करत आहेत. बलजीतचा मृत्यू होण्याआधी त्याच्या घरी कोणी आलं होतं का याचा तपास सुरू आहे. याबरोबरच बलजीतचे कुटुंबीय आणि त्याच्या संपर्कात असलेल्या लोकांचीही चौकशी केली जात आहे. बलजीत सिंह नशेच्या आहारी गेल्याचंही सांगण्यात येत आहे. परंतु, अंकित बलियानच्या हत्येनंतर अशाप्रकारे बलजीत सिंहचा मृतदेह आढळल्याने सिनेसृष्टीत खळबळ उडाली आहे.