पुण्याच्या विकासकामांना मोठा धक्का! चांदणी चौक ते भूगाव रस्त्याच्या कामाची निविदा अखेर रद्द, प्रशासनाचा मोठा निर्णय

पुणे: पुणे महापालिकेच्या प्रकल्प विभागाकडून चांदणी चौक ते भूगाव या ६० मीटर रुंदीच्या महत्त्वाच्या रस्त्यासह उड्डाणपूल आणि ग्रेड सेपरेटरच्या कामासाठी काढण्यात आलेल्या निविदेमध्ये मोठा घोळ झाल्याचा गंभीर आरोप करण्यात आला होता. या प्रकरणाची दखल घेत अखेर प्रशासनाने आधीची निविदा प्रक्रिया पूर्णपणे रद्द करून नवीन फेरनिविदा काढण्याचे आदेश दिले आहेत. महापालिका आयुक्त नवल किशोर राम यांनी बुधवारी याविषयीचे निर्देश संबंधित विभागाला दिले आहेत.

काही दिवसांपूर्वीच काँग्रेसचे नगरसेवक अरविंद शिंदे यांनी आयुक्तांकडे लेखी पत्राद्वारे तक्रार करत, मर्जीतील विशिष्ट ठेकेदाराला हे काम लावण्यासाठी निविदेतील अटींमध्ये जाणीवपूर्वक फेरफार करण्यात आल्याचा आरोप केला होता. भूगावकडून चांदणी चौकात येणाऱ्या मार्गावरील वाहतूक कोंडी सोडवण्यासाठी हा उड्डाणपूल उभारला जाणार आहे. मात्र, हे काम एका ठराविक ठेकेदारालाच मिळण्यासाठी काही पदाधिकाऱ्यांचे प्रयत्न सुरू असल्याचा संशय व्यक्त करत, ही वादग्रस्त निविदा प्रक्रियाच रद्द करण्याची मागणी अरविंद शिंदे यांनी केली होती.

खर्चातील तफावतीचा मुद्दा आणि प्रशासनाचा खुलासा

या प्रकल्पाच्या कामासाठी महापालिकेच्या अंदाज समितीने तयार केलेला मूळ अपेक्षित खर्च आणि प्रत्यक्षात निविदेमध्ये धरण्यात आलेल्या खर्चाच्या आकड्यात मोठी तफावत असल्याचे समोर आले होते. अंदाज समितीने तयार केलेल्या अंदाजापेक्षा तब्बल ४५ कोटी रुपये अधिक खर्च निविदेत धरण्यात आल्याचा आरोप करण्यात आला होता.

यावर महापालिकेच्या वतीने स्पष्टीकरण देण्यात आले की, प्रकल्पाचा अपेक्षित खर्च आणि निविदेतील खर्चामध्ये केवळ दीड कोटी रुपयांची वाढ झाली आहे. महापालिकेच्या अंदाज समितीने हा अंदाज डिसेंबर २०२५ मध्ये दिला होता. त्यानंतर काही साहित्याच्या व वस्तूंच्या दरात वाढ झाली, तसेच निविदा प्रक्रिया राबवत असताना मंजूर झालेला नकाशा आणि प्रत्यक्ष कामाच्या जागेवरील गरजेनुसार काळानुरूप बदल करणे आवश्यक होते. त्यामुळेच खर्चात थोडी वाढ झाली असल्याचे प्रशासनाकडून सांगण्यात आले.