Pune : छगन भुजबळ यांच्या हेलिकॉप्टरचे कार पार्किंगमध्ये अनपेक्षित लँडिंग; पायलटच्या चुकीमुळे गोंधळ, सुदैवाने कोणतीही दुर्घटना नाही

Pune : राष्ट्रवादी काँग्रेसचे ज्येष्ठ नेते आणि अन्न व नागरी पुरवठा मंत्री छगन भुजबळ यांच्या हेलिकॉप्टरचे लँडिंग करताना पायलटकडून गंभीर चूक झाल्याची घटना समोर आली आहे. हेलिपॅड समजून पायलटने चक्क कार पार्किंग लॉटमध्ये हेलिकॉप्टर उतरवले. सुदैवाने या प्रकारात कोणतीही जीवितहानी किंवा अपघात झाला नाही आणि छगन भुजबळांसह सर्वजण सुखरुप आहेत.

ही घटना पुरंदर तालुक्यातील खानवडी येथे घडली. महात्मा फुले यांच्या १९९व्या जयंतीनिमित्त खानवडीत (महात्मा फुले यांचे मूळ गाव) भव्य कार्यक्रमाचे आयोजन करण्यात आले होते. मुख्यमंत्री देवेंद्र फडणवीस यांच्यासह अनेक मंत्री या कार्यक्रमाला उपस्थित राहणार आहेत. छगन भुजबळ हे नाशिकहून हेलिकॉप्टरने कार्यक्रमस्थळी येत होते.

पायलटचा गैरसमज
खानवडीत हेलिकॉप्टरसाठी वेगळे हेलिपॅड तयार करण्यात आले होते. मात्र, कार्यक्रमस्थळी कार पार्किंग लॉटमध्ये फारशा गाड्या नसल्याने मोकळी जागा दिसताच पायलटने तिथेच हेलिपॅड असल्याचा गैरसमज करून हेलिकॉप्टर उतरवले. भुजबळ बाहेर पडल्यानंतर हेलिकॉप्टरला मूळ हेलिपॅडकडे हलवण्यात आले.
कार्यालयाकडून गांभीर्याने दखल
भुजबळ यांच्या कार्यालयाने या प्रकाराची गंभीर दखल घेतली असून, पायलटवर काय कारवाई होते याकडे सर्वांचे लक्ष लागले आहे. उपमुख्यमंत्री अजित पवार यांचा बारामती येथे विमान अपघात झाल्याची घटना जेमतेम अडीच महिन्यांपूर्वी घडली असतानाच हा नवा प्रकार घडल्याने राष्ट्रवादी समर्थकांमध्ये चिंता व्यक्त केली जात आहे.

सध्या या घटनेची अधिक चौकशी सुरू असून, पायलट आणि संबंधित यंत्रणेवर काय निर्णय घेतला जातो, हे लवकरच स्पष्ट होईल.