Pune : ‘नो डीजे’चा ऐतिहासिक निर्णय; डॉ. बाबासाहेब आंबेडकर जयंती शांततेत आणि विचार जागरात साजरी होणार

Pune :  यंदा पुण्यातील डॉ. बाबासाहेब आंबेडकर जयंतीचा उत्सव पूर्णपणे वेगळ्या पद्धतीने साजरा होणार आहे. शहरातील प्रमुख दलित संघटना आणि आंबेडकर जयंती महोत्सव समितीने मिळून ‘नो डीजे’ असा निर्णय घेतला आहे. गेली २५ वर्षे चालत आलेली स्पीकर वाजवण्याची परंपरा यंदा कायमची थांबवण्यात येणार आहे.

भारतरत्न डॉ. बाबासाहेब आंबेडकर मध्यवर्ती जयंती महोत्सव समितीचे अध्यक्ष राहुल डंबाळे यांनी सांगितले की, रामभाऊ डंबाळे, सुवर्णा डंबाळे, सिद्धांत सुर्वे, प्रदीप कांबळे, निखिल बहुले आदी अनेक कार्यकर्त्यांच्या एकमताने हा निर्णय घेण्यात आला आहे.

का घेतला हा निर्णय?
पुणे स्टेशन परिसरात अभिवादनासाठी येणाऱ्या हजारो अनुयायांच्या गर्दीमुळे ध्वनिप्रदूषण होऊ नये आणि ज्येष्ठ नागरिक, रुग्णांना त्रास होऊ नये, यासाठी हा निर्णय घेण्यात आला आहे. समितीने इतर सर्व मंडळांना देखील स्पीकर न वापरण्याचे आवाहन केले आहे.

गोंगाटाऐवजी शांत विचारांचा जागर
यंदा मोठ्या आवाजाऐवजी शांततेत डॉ. बाबासाहेबांच्या विचारांचा प्रसार करण्यावर भर देण्यात येणार आहे. या निर्णयाचे पुणे पोलिस प्रशासनानेही स्वागत केले आहे.

विशेष उपक्रम
स्पीकरवर होणारा खर्च वाचवून १,००० अनुयायांना महापुरुषांच्या विचारांवर आधारित पुस्तके मोफत वाटण्यात येणार आहेत.

‘वाचाल तर वाचाल’ हा बाबासाहेबांचा संदेश प्रत्यक्षात उतरवण्याचा हा प्रयत्न आहे.
उत्सवाचे मुख्य आकर्षण

३० फुट उंचीचे भव्य बुद्धरूप देखावा
तथागत बुद्ध, सम्राट अशोक आणि डॉ. बाबासाहेब आंबेडकर यांच्या जीवनावर आधारित तीन पात्री मूकपट (साइलेंट ड्रामा)
पुण्याचा हा ‘नो डीजे’ निर्णय महाराष्ट्रातील इतर शहरांसाठी एक नवा आदर्श ठरेल, असे मानले जात आहे.