BMC Election : राष्ट्रवादीचा मोठा निर्णय! मुंबई महापालिका निवडणुकीत स्वबळावरच लढणार; ३७ उमेदवारांची पहिली यादी जाहीर, कोण-कोण मैदानात?

Mumbai : महायुतीमध्ये समावेश होण्यासाठी भाजपकडून साफ नकार मिळाल्याने अखेर राष्ट्रवादी काँग्रेस पक्षाने मुंबई महापालिकेसाठी उमेदवार यादी रविवारी सायंकाळी जाहीर केली. पहिल्या यादीत ३७ उमेदवारांच्या नावाचा समावेश असून जवळपास १०० जागांवर पक्ष निवडणूक लढविणार असल्याचे कळते.
विशेष म्हणजे, पहिल्या यादीत नवाब मलिक यांची बहीण डॉ. सईदा खान, बंधू कप्तान मलिक आणि कप्तान मलिक यांची सून बुशरा मलिक यांना उमेदवारी देण्यात आली आहे. तसेच, गेल्या २४ तासांत शरद पवार यांच्या पक्षातून राष्ट्रवादीत आलेल्या कार्यकर्त्यांनाही उमेदवारी जाहीर करण्यात आली आहे. आमदार सुनील राऊत यांच्या जवळचा आणि गुन्हेगारी पार्श्वभूमी असलेल्या सज्जू मलिक यालाही पक्षाने उमेदवारी दिली आहे.
मुंबई महापालिका निवडणुकीत महायुतीमधील प्रवेशावरून भाजपने नवाब मलिक यांच्यामुळे राष्ट्रवादी काँग्रेसला नकार दिला होता. तरीही प्रदेशाध्यक्ष सुनील तटकरे यांनी भाजपचे मंत्री आशिष शेलार यांच्याशी चर्चा सुरू ठेवली होती. परंतु, अखेर, भाजपकडून कुठलाही सकारात्मक प्रतिसाद न आल्याने राष्ट्रवादी काँग्रेसने रविवारी रात्री ३७ उमेदवारांचा समावेश असलेली पहिली यादी जाहीर केली.
पहिल्या यादीत, नवाब मलिक यांच्या घरातीलच तीन जणांचा समावेश आहे. वॉर्ड क्रमांक १६५ मधून अब्दुल रशीद ऊर्फ कप्तान मलिक, १६८ मधून डॉ. सईदा खान आणि १७० मधून कप्तान मलिक यांची सून बुशरा परवीन मलिक यांना उमेदवारी जाहीर करण्यात आली आहे. रविवारी पहिली यादी जाहीर करत ही निवडणूक नवाब मलिक यांच्या नेतृत्वातच लढवित असल्याचे थेट प्रत्युत्तर पक्षाकडून भाजपला देण्यात आले आहे.
बहुतेक पक्षांचे उमेदवार निश्चित होत असल्याने संधी हिरावल्याची कुणकुण लागलेल्या माजी नगरसेवक तसेच कार्यकर्त्यांनी पक्षांतराला सुरुवात केली आहे. रविवारी राष्ट्रवादी काँग्रेसच्या प्रदेश कार्यालयात अशा कार्यकर्त्यांनी एकच गर्दी केली होती. राष्ट्रवादी काँग्रेस शरद पवारचंद्र पक्षाचे ईशान्य मुंबई जिल्हाध्यक्ष आणि माजी नगरसेवक धनंजय पिसाळ, मुंबई प्रदेश प्रवक्ते मनीष दुबे हे गेल्या २४ तासांत राष्ट्रवादीत दाखल झाले होते. या दोघांनाही पहिल्या यादीत उमेदवारी जाहीर करण्यात आली आहे. तर मनसेचे अणुशक्तीनगर विधानसभा विभागअध्यक्ष रवींद्र गवस हे दोन दिवसांपूर्वी पक्षात दाखल झाले होते. त्यांची मुलगी रचना गवस यांना पक्षाने वॉर्ड १४३ मधून उमेदवारी दिली आहे. तर २०१२मध्ये महापालिका निवडणुकीत मनसेकडून निवडणूक लढवलेले दिलीप पाटील यांना १४४ मधून उमेदवारी मिळाली आहे.
भांडुप परिसरात खंडणीखोरी, मारहाण अशा गुन्हेगारी कृत्यात सहभागी असलेला आणि शिवसेना उबाठा पक्षाचे आमदार सुनील राऊत यांचा जवळचा मानण्यात येणाऱ्या सज्जू मलिक यालाही राष्ट्रवादीने उमेदवारी दिली आहे. शहरातील बहुतांशी सर्व भागात पक्ष निवडणूक लढवणार असून आणखी दोन याद्या पक्षाकडून जाहीर करण्यात येणार आहेत.
वादग्रस्त नितीन देशमुख यांचीही उडी ?
उमेदवारी अर्ज भरण्याची मुदत जवळ येत असताना संधी मिळावी यासाठी उड्या मारण्यास सुरुवात झाली आहे. राष्ट्रवादी काँग्रेस शरदचंद्र पवार पक्षाचे मुख्य प्रवक्ते जितेंद्र आव्हाड यांचे विश्वासू समजले जाणारे नितीन देशमुख हे पावसाळी अधिवेशनादरम्यान विधानभवनात भाजप आमदार गोपीचंद पडळकर यांच्या कार्यकर्त्यांशी हाणामारी केल्यावर चर्चेत आले. त्यानंतर पक्षाने त्यांच्या गळ्यात प्रवक्तेपदाची माळही टाकली होती. काही दिवसांपूर्वी पवई येथील निवासी संकुलात हाणामारी केल्याने देशमुख यांना तुरुंगामध्येही जावे लागले. रविवारी रात्री राष्ट्रवादीच्या मुख्यालयात ते दाखल झाले. पत्नी प्रियांका देशमुख यांना १२४ या वॉर्डमधून उमेदवारी मिळावी यासाठी देशमुख प्रयत्नशील होते. मात्र, स्वतःच्या पक्षात संधी मिळत नसल्याने देशमुख थेट अजित पवार यांच्या राष्ट्रवादीच्या प्रदेश कार्यालयात आले. मात्र, त्यांचा प्रवेश झाला की नाही, याला दुजोरा मिळाला नाही.
आगामी महापालिका निवडणूक नवाब मलिक यांच्याच नेतृत्वात लढविण्यात येणार आहे. सर्व जातीधर्माच्या कार्यकर्त्यांना संधी देत असतानाच तरुणांना विशेषतः महिलांना आम्ही संधी दिली आहे. - आमदार सना मलिक