लातूर: कौटुंबिक वादातून पत्नीला पेट्रोल टाकून जिवंत जाळले; पतीसह तिघांविरुद्ध गुन्हा दाखल.

लातूर: उदगीर शहरात एक अत्यंत धक्कादायक आणि चीड आणणारी घटना उघडकीस आली आहे. कौटुंबिक वादातून पतीने आपल्याच पत्नीच्या अंगावर पेट्रोल टाकून तिला जिवंत जाळल्याची भीषण घटना घडली आहे. या अमानुष कृत्यात गंभीर भाजल्यामुळे तस्लिम शफी कुरेशी (वय ३६) या महिलेचा जागीच मृत्यू झाला.

नेमकी घटना काय?
मिळालेल्या माहितीनुसार, कुरेशी कुटुंबामध्ये गेल्या काही दिवसांपासून कौटुंबिक कारणावरून वाद सुरू होते. ४ जुलै रोजी या वादाने उग्र रूप धारण केले. आरोपी पतीने रागाच्या भरात तस्लिम यांच्या अंगावर पेट्रोल ओतून त्यांना पेटवून दिले, असा गंभीर आरोप मयत महिलेच्या नातेवाईकांनी केला आहे. या घटनेत होरपळून तस्लिम यांचा दुर्दैवी अंत झाला.

 

या घटनेची माहिती मिळताच उदगीर ग्रामीण पोलिसांनी तात्काळ घटनास्थळी धाव घेतली. पोलिसांनी पंचनामा करून पुरावे गोळा केले असून, मयत महिलेच्या नातेवाईकांच्या तक्रारीवरून पतीसह तिघांविरुद्ध गुन्हा दाखल करण्यात आला आहे. या अमानुष कृत्यामागील नेमके कारण शोधण्यासाठी पोलीस अधिक तपास करत आहेत. या घटनेमुळे संपूर्ण उदगीर परिसरात मोठी खळबळ उडाली असून नागरिकांमधून संताप व्यक्त केला जात आहे.