कोल्हापूर: शिक्षणमहर्षी पद्मश्री डी. वाय. पाटील यांचे कोल्हापुरात वयाच्या ९० व्या वर्षी निधन; शिक्षण, आरोग्य आणि क्रीडा क्षेत्रातील मोठी हानी

कोल्हापूर: राज्यातील ज्येष्ठ नेते आणि शिक्षणमहर्षी पद्मश्री डॉ. ज्ञानदेव यशवंतराव पाटील ऊर्फ डी. वाय. पाटील यांचं वयाच्या ९० व्या वर्षी वृद्धापकाळाने निधन झालं आहे. गेल्या काही दिवसांपासून त्यांची प्रकृती खालावली होती, आणि अखेर त्यांनी आज सकाळी कोल्हापूर येथे अखेरचा श्वास घेतला. शिक्षण, आरोग्य आणि क्रीडा क्षेत्रात मोठं साम्राज्य उभं करणाऱ्या डी. वाय. पाटील यांच्या निधनाने राज्यभर हळहळ व्यक्त केली जात आहे.

डॉ. डी. वाय. पाटील यांनी काँग्रेस पक्षातून आपल्या राजकीय कारकीर्दीला सुरुवात केली होती. काँग्रेसच्या तिकिटावर ते आधी नगरसेवक आणि नंतर दोनदा आमदार म्हणून निवडून आले. डी. वाय. पाटील हे १९५७ ते १९६२ दरम्यान कोल्हापूर शहराचे महापौर देखील राहिले होते. मात्र, निवडणुकीच्या राजकारणात त्यांचं मन फार काळ रमलं नाही. त्यांनी आपले लक्ष शिक्षणक्षेत्राकडे वळवले आणि राज्यात नव्हे तर संपूर्ण देशभरात आपल्या शिक्षणसंस्थांचे मोठे जाळं उभारले. विविध रुग्णालयांच्या माध्यमातून त्यांनी आरोग्य क्षेत्रातही मोठे योगदान दिले. तसेच, नवी मुंबई येथे भव्य क्रिकेट स्टेडियम उभारत क्रीडा क्षेत्रातही आपला मोठा ठसा उमटवला.

 

दीर्घकाळ काँग्रेस पक्षात सक्रिय राहिलेल्या डी. वाय. पाटील यांनी २४ डिसेंबर २०१८ रोजी राष्ट्रवादी काँग्रेस पक्षात जाण्याचा निर्णय घेतला होता. त्यांच्या निधनामुळे महाराष्ट्राने एक दूरदृष्टीचा नेता, उत्कृष्ट शिक्षणतज्ज्ञ
आणि समाजसेवक गमावला आहे.

दरम्यान, डी. वाय. पाटील यांचे पार्थिव अंत्यदर्शनासाठी बुधवार दिनांक ५ ऑगस्ट रोजी सकाळी ११ ते सायंकाळी ४ वाजेपर्यंत 'यशवंत निवास', कसबा बावडा इथे ठेवण्यात येणार आहे. उद्या सायंकाळी ४ वाजता अंत्ययात्रा निघणार असून सायंकाळी ५ वाजता डी. वाय. पाटील मेडिकल कॉलेज, लाईन बाजार, कसबा बावडा येथे त्यांच्यावर अंत्यसंस्कार पार पडतील, अशी माहिती देण्यात आली आहे.