गडचिरोलीत 'जेएसडब्ल्यू' प्रकल्पाला माओवाद्यांच्या नावे धमकी; एटापल्लीत खळबळ, स्थानिकांचा विरोध नसल्याने पोलिसांना संशय!

गडचिरोली: जिल्ह्यातील एटापल्ली तालुक्यातील वटेली परिसरात लोहखनिज उत्खननासाठी हालचाली सुरू केलेल्या 'जेएसडब्ल्यू' (JSW) कंपनीच्या वरिष्ठ अधिकाऱ्यांना ठार मारण्याची धमकी देणारे पत्रक आढळून आल्याने परिसरात खळबळ उडाली आहे. या पत्रकात 'लाल सलाम' असा उल्लेख असून, कंपनीने तातडीने कामकाज थांबवून परिसर सोडावा, असा इशारा देण्यात आला आहे.

मात्र, पोलीस तपासानुसार या भागात सध्या कोणत्याही माओवादी हालचालींची नोंद नाही. विशेष म्हणजे, या प्रकल्पाविरोधात स्थानिक ग्रामसभा किंवा ग्रामस्थांकडूनही अधिकृतरीत्या कोणताही विरोध दर्शवण्यात आलेला नाही. या सर्व गोष्टींचा विचार करता, माओवाद्यांच्या नावाचा आणि प्रतिमेचा वापर करून कोणीतरी बाहेरील व्यक्तीने खोडसाळपणातून हे कृत्य केल्याचा दाट संशय पोलिसांनी व्यक्त केला आहे.

स्थानिक वातावरण गढूळ करण्याचा आणि विकासकामांमध्ये अडथळा आणण्याचा हा एक सुनियोजित प्रयत्न असल्याचे प्राथमिक तपासात दिसून येत आहे. हेडरीचे उपअधीक्षक योगेश रांजणकर यांनी दिलेल्या माहितीनुसार, पोलीस या प्रकरणाचा तांत्रिक आणि गुप्तहेरांच्या माध्यमातून सखोल तपास करत असून, या भागात गस्त व बंदोबस्त वाढवण्यात आला आहे.