T20 WC 2026: पाकिस्तान नामिबिया सामना पावसामुळे रद्द झाला तर…! सुपर 8 फेरीत कोणाला संधी? जाणून घ्या

टी20 वर्ल्डकप 2026 स्पर्धेच्या सुपर 8 फेरीतील सात संघ ठरले आहेत. भारत, श्रीलंका, झिम्बाब्वे, न्यूझीलंड, वेस्ट इंडिज, दक्षिण अफ्रिका, इंग्लंड या सात संघांनी सुपर 8 फेरीत जागा पक्की केली आहे. आता अ गटातून एका संघाची निवड होणं बाकी आहे. पाकिस्तान की अमेरिका या दोन पैकी एका संघाला संधी मिळेल. या दोन संघात जर तरची लढाई आहे. पाकिस्तान नामिबिया सामन्यावर सर्वकाही अवलंबून असणार आहे. या सामन्याचा निकाला सुपर 8 फेरीतील शेवटचा संघ ठरवणार आहे. त्यामुळे या सामन्याकडे क्रीडाप्रेमींच्या नजरा लागून आहेत. या सामन्याचा निकाल काय लागेल वगैरे याची चिंता क्रीडाप्रेमींना लागून आहे. दुसरीकडे, श्रीलंकेतील लहरी वातावरणाचा फटका ऑस्ट्रेलियाला बसल्याचं दिसलं. झिम्बाव्बे आयर्लंड सामन्यात पावसाने हजेरी लावली आणि सामना रद्द झाला. श्रीलंकेच्या पल्लेकेले आंतरराष्ट्रीय क्रिकेट स्टेडियममध्ये पावसाने हजेरी लावल्याने आयर्लंड झिम्बाब्वे सामना झाला नाही. त्यामुळे झिम्बाब्बेला 1 गुण मिळाला आणि ऑस्ट्रेलियाचं स्पर्धेतील आव्हान संपुष्टात आलं. असाच पाऊस जर पाकिस्तान नामिबिया सामन्यात झाला तर… सर्व गणित समजून घेऊयात.

पाकिस्तानचे सर्व सामने हे श्रीलंकेत होत आहेत. पाकिस्तानचा साखळी फेरीतील शेवटचा सामना कोलंबोतील सिंहालीज स्पोर्ट्स क्लबवर होत आहे. या सामन्यात पावसाने हजेरी लावली आणि सामना रद्द करण्याची वेळ आली तर पाकिस्तानला फायदा होईल. कारण 5 गुणांसह पाकिस्तानचा संघ सुपर 8 फेरीत जागा मिळवेल. त्यामुळे या सामन्यात पाऊस पडू नये अशी प्रार्थना अमेरिकन संघ करत असावा. मागच्या पर्वात म्हणजेच टी20 वर्ल्डकप 2024 स्पर्धेत अमेरिकेने सुपर 8 फेरीत जागा मिळवली होती. तर पाकिस्तानचं आव्हान साखळी फेरीतच संपुष्टात आलं होतं. हाच कित्ता गिरवला जाणार की नाही हे उद्याच्या सामन्यावर अवलंबून आहे.

पाकिस्तान नामिबिया सामन्याचा निकाल महत्त्वाचा आहे. या सामन्यात पाकिस्तानने विजय मिळवला तर थेट सुपर 8 फेरीचं तिकीट मिळेल. पण या सामन्यात पराभूत झाले तर अमेरिकेला संधी मिळेल. त्यामुळे या सामन्यात नामिबिया जिंकावी असंच अमेरिकन संघाला वाटत असावं. कारण दोन्ही संघांचे समान गुण असले तरी अमेरिकन संघ नेट रनरेटच्या बाबतीत पुढे आहे. दरम्यान, या स्पर्धेत क्रीडाप्रेमींना आधीच एक उलटफेर पाहायला मिळाला आहे. नामिबिया चमत्कार करणार का? याकडे लक्ष लागून आहे. नामिबियाची या स्पर्धेतील कामगिरी काही खास राहिली नाही. तीन पैकी तीन सामने गमावले. आता चौथा सामना जिंकून शेवट गोड करण्याचा प्रयत्न असेल. जर तसं झालं तर पाकिस्तानला गाशा गुंडाळावा लागेल.