खाकी वर्दीला कलंक! मुंबई-नाशिक महामार्गावर मध्यरात्री व्यापाऱ्याची ६१.५ लाखांची लूट; पोलिसांसह पाच जण अटकेत

मुंबई-नाशिक महामार्गावर सुरक्षेचा प्रश्न ऐरणीवर आणणारी एक अतिशय खळबळजनक आणि धक्कादायक घटना समोर आली आहे. महामार्गावर मध्यरात्रीच्या सुमारास एका पेढीच्या (अंगडिया) वाहनाला अडवून, वाहन चालकाला आणि त्याच्या सहकाऱ्याला बेदम मारहाण करत तब्बल ६१ लाख ५० हजार रुपयांची रोकड लुटण्यात आली. विशेष म्हणजे, या दरोड्यामध्ये इतर गुन्हेगारांसोबतच खुद्द पोलीस कर्मचारीच सामील असल्याचा प्रकार उघडकीस आल्याने संपूर्ण पोलीस दलात आणि व्यावसायिक वर्तुळात एकच खळबळ उडाली आहे. याप्रकरणी शहापूर पोलिसांनी तातडीने कारवाई करत पाच जणांना बेड्या ठोकल्या आहेत.

मिळालेल्या सविस्तर माहितीनुसार, सुरत आणि मुंबई परिसरातील एका अँगडिया कंपनीत व्हैन चालक म्हणून काम करणारे गोविंद पटेल हे आपल्या जिगरभाई पटेल या साथीदारासोबत ग्वाल्हेर येथून सुमारे १ कोटी रुपयांची रोख रक्कम घेऊन मुंबईतील मालाड येथील कार्यालयाच्या दिशेने निघाले होते. २४ ऑगस्ट रोजी पहाटेच्या सुमारास त्यांचे वाहन मुंबई-नाशिक महामार्गावरील खर्डी गावाच्या हद्दीत आले असता, महामार्गावरील एका हॉटेलजवळ त्यांनी विश्रांती घेतली. तिथून पुढे निघाल्यानंतर काही अंतरावर पाठीमागून आलेल्या एका अज्ञात वाहनातील तीन ते चार जणांनी त्यांच्या गाडीची काच ठोठावली आणि गाडी थांबवण्यास भाग पाडले.

चालकाने काच उघडताच आरोपींनी स्वतःची ओळख 'आम्ही क्राईम ब्रँचचे पोलीस आहोत' अशी सांगत धमकावण्यास सुरुवात केली. तुमचे वाहन घेऊन तात्काळ पोलीस चौकीत चला, असे सांगून आरोपींनी चालकाकडून गाडीची चावी जबरदस्तीने ताब्यात घेतली. त्यानंतर चालक गोविंद आणि त्यांचे साथीदार जिगरभाई यांना त्यांच्याच वाहनाच्या मधल्या सीटवर जबरदस्तीने बसवून बेदम मारहाण करण्यात आली. आरोपींनी त्यांचे वाहन काही वेळ नाशिकच्या दिशेने नेले आणि नंतर पुन्हा फिरवून मुंबई-नाशिक महामार्गावरील एका बंद पडलेल्या हॉटेलजवळ आणून थांबवले. तिथे पुन्हा एकदा त्यांना बेदम मारहाण करत वाहनात असलेल्या एकूण १ कोटी रुपयांपैकी ६१ लाख ५० हजार रुपये बळकावले आणि उर्वरित रक्कम तसेच कागदपत्रे तिथेच सोडत आरोपी दुसऱ्या पांढऱ्या रंगाच्या कारमधून पसार झाले.

याप्रकरणी वाहनचालक गोविंद पटेल यांनी शहापूर पोलीस ठाण्यात येऊन अज्ञात दरोडेखोरांविरोधात सविस्तर फिर्याद दाखल केली. फिर्यादीत आरोपी हे पोलिसांच्या वेशभूषेत आणि काहीजण पोलीस असल्यासारखे भासत असल्याचा उल्लेख होता. गुन्ह्याचे गांभीर्य आणि संवेदनशीलता लक्षात घेऊन शहापूर पोलिसांनी तातडीने तपासाची चक्रे वेगाने फिरवली. तांत्रिक विश्लेषन आणि सीसीटीव्ही फुटेजच्या आधारे पोलिसांनी तपास केला असता, हे दरोडेखोर दुसरेतिसरे कोणी नसून यामध्ये ठाणे ग्रामीण पोलीस दलातील काही कर्मचाऱ्यांचा प्रत्यक्ष सहभाग असल्याचे समोर आले. पोलिसांनी धडक कारवाई करत आतापर्यंत ५ जणांना अटक केली असून, या रॅकेटमध्ये सहभागी असलेल्या इतर फरार आरोपींचा कसून शोध घेतला जात आहे.