उत्तर प्रदेश: मेरठमधील संतापजनक प्रकार: अवघ्या ५ मिनिटांच्या उशिरावरून डिलिव्हरी बॉयला फ्लॅटमध्ये डांबून बेदम मारहाण, सीसीटीव्ही व्हिडिओ व्हायरल

उत्तर प्रदेश: मेरठमध्ये धक्कादायक घटना घडली आहे. डिलिव्हरी पोहोचवण्यास अवघा ५ मिनिटांचा उशीर झाल्यामुळे एका डिलिव्हरी बॉयला बेदम मारहाण करण्यात आल्याचा प्रकार समोर आला आहे. या संपूर्ण घटनेचं CCTV फुटेज सध्या सोशल मीडियावर प्रचंड व्हायरल होत आहे. सोशल मीडियावर व्हायरल झालेल्या फुटेजमध्ये, लाल रंगाचा टीशर्ट घातलेला एक तरुण अपार्टमेंटमध्ये डिलिव्हरी देण्यासाठी आलेला दिसत आहे. त्याच वेळी एका फ्लॅटमधून एक व्यक्ती बाहेर येते आणि रागाच्या भरात मारायला सुरुवात करते. वाद घालते.

डिलिव्हरी बॉयच्या हातातील मोबाईल हिसकावला
CCTV फुटेजमध्ये स्पष्ट दिसत आहे की, वादादरम्यान त्या व्यक्तीने डिलिव्हरी बॉयच्या हातातील मोबाईल हिसकावून घेतला. त्यानंतर त्याने तरुणाला मारहाण करण्यास सुरुवात केली. व्हिडिओमध्ये आरोपी डिलीव्हरी बॉयला कानशिलात मारताना आणि लाथाबुक्क्यांनी मारहाण करताना दिसत आहे. डिलिव्हरी बॉय स्वतःचा मोबाईल परत मागताना दिसत आहे.

डिलिव्हरी बॉयला मारहाण
फ्लॅटमधून एक महिलाही बाहेर येते आणि संपूर्ण घटनेदरम्यान तिथेच उभी राहते. काही वेळानंतर त्या तरुणाला जबरदस्तीने फ्लॅटच्या आत घेऊन जातानाही CCTV मध्ये दिसत आहे. फ्लॅटच्या आत नेऊनही डिलिव्हरी बॉयला मारहाण करण्यात आल्याचा दावा केला जात आहे. काही वेळाने तरुण फ्लॅटमधून बाहेर पडताना दिसत आहे.

१४ ऑगस्ट रोजी घडली घटना
मेरठमधील भावनपूर पोलीस ठाण्याच्या हद्दीतील 'गंगा हाईट्स अपार्टमेंट' मध्ये ही घटना घडल्याचं सांगण्यात येत आहे. ही घटना १४ ऑगस्ट रोजी रात्री ९:३० वाजेच्या सुमारास घडल्याची माहिती आहे. मिळालेल्या माहितीनुसार, अमित असं या डिलिव्हरी बॉयचं नाव असून केवळ ५ मिनिटं उशिरा पोहोचल्याच्या कारणावरून त्याला ही अमानुष मारहाण करण्यात आली.

पोलीस तपास सुरू
व्हिडिओ समोर आल्यानंतर पोलिसांनी या प्रकरणाची तातडीने दखल घेतली आहे. या प्रकरणाची चौकशी करून आवश्यक ती कायदेशीर कारवाई करण्याचे निर्देश देण्यात आले आहेत. पोलीस सध्या व्हायरल व्हिडिओच्या आधारे घटनेची सत्यता, ठिकाण आणि वेळेची सखोल तपासणी करत असून घटनेत सहभागी असलेल्या लोकांची ओळख पटवण्याचं काम सुरू आहे.