Shahbaz Sharif : तुम्ही दक्षिण आशियाचे…तुमच्यासारखं..पाकिस्तानी पंतप्रधान शहबाज शरीफ यांच्याकडून पुन्हा एकदा ट्रम्प यांची चाटूगिरी

युद्धामध्ये गाझा पट्टी उद्धवस्त झाली आहे. त्याच्या पुनर्निर्माणासाठी अमेरिकेचे राष्ट्राध्यक्ष डोनाल्ड ट्रम्प यांच्या पुढाकाराने बोर्ड ऑफ पीसची स्थापना झाली आहे. या बोर्ड ऑफ पीसची पहिली बैठक गुरुवारी झाली. वॉशिंग्टन डीसी येथे डोनाल्ड जे ट्रंप इंस्टीट्यूट ऑफ पीस येथे पहिली बैठक आयोजित करण्यात आली होती. त्यात पाकिस्तानी पंतप्रधान शहबाज शरीफ सहभागी झालेले. शहबाज शरीफ यांनी बैठकीत अमेरिकी राष्ट्राध्यक्षांना मस्का लावण्यात कुठलीही कसर ठेवली नाही.

पाकिस्तानी पंतप्रधान शहबाज शरीफ यांनी गाझा पट्टीच्या पुनर्निर्माणासाठी झालेल्या या बैठकीचा वापर मस्कापॉलिशसाठी केला. त्यांनी अमेरिकी राष्ट्राध्यक्ष ट्रम्प यांना दक्षिण आशियाचं सेवियर म्हटलं. म्हणजे वाचवणारे. शरीफ इथपर्यंतच थांबले नाहीत, ते ट्रम्प यांना तुमच्यासारखं कोणी नाही असंही म्हणाले. ट्रम्प यांच्या बोर्ड ऑफ पीसच्या पहिल्या बैठकीत पाकिस्तानी पंतप्रधान शहबाज शरीफ यांनी डोनाल्ड ट्रम्प यांना शांती दूत ठरवलं.

शहबाज शरीफ अजून काय म्हणाले?

खऱ्या अर्थाने ट्रम्प हे दक्षिण आशियाचे खरे रक्षक आहेत. दक्षिण आशियाचा ते उद्धार करणार आहेत. शहबाज इतक्यावरच थांबले नाहीत, त्यांनी भारतासोबत युद्ध सुरु असताना ट्रम्प यांनी घेतलेल्या भूमिकेचं कौतुक केलं. युद्ध थांबवण्याचे त्यांचे दावे योग्य ठरवले. अमेरिकी राष्ट्राध्यक्ष ट्रम्प यांनी क्षेत्रात शांततेसाठी काम केल्याचं म्हटलं.

बोर्ड ऑफ पीसमध्ये किती देश?

पाकिस्तानी पंतप्रधानांच्या या दाव्यांवरुन भारत-पाकिस्तान संघर्ष विरामाच्यावेळी ट्रम्प यांनी केलेल्या दाव्यांची पुन्हा चर्चा सुरु झाली आहे. अमेरिकी राष्ट्राध्यक्षांच्या पुढाकारने स्थापन झालेल्या बोर्ड ऑफ पीसमध्ये पाकिस्तानसह 27 देश आहेत. अर्जेंटीना, अजरबैजान, सौदी अरेबिया, यूएई आणि इस्रायल हे देश या बोर्डामध्ये आहेत. पॅलेस्टाइन मात्र यामध्ये नाहीय.

भारताची भूमिका काय?

अमेरिकी राष्ट्राध्यक्ष ट्रम्प यांनी बोर्ड ऑफ पीसमध्ये सहभागी होण्यासाठी भारताचे पंतप्रधान नरेंद्र मोदी यांना निमंत्रण दिलं. बोर्डाच्या पहिल्या बैठकीत भारत ऑब्जर्वर म्हणून सहभागी झालेला. वाशिंगटन डीसीमध्ये झालेल्या बैठकीत भारताकडून दूतावासाचे ‘चार्ज डी अफेयर्स’ नमग्या खम्पा यांनी प्रतिनिधीत्व केलं.