SBI ग्राहकांनो लक्ष द्या! शनिवारपासून सलग ६ दिवस बँक शाखा बंद राहण्याची शक्यता; काय आहे कारण?

पुणे: जर तुमचे स्टेट बँक ऑफ इंडिया (SBI) मध्ये खाते असेल, तर ही बातमी तुमच्यासाठी अत्यंत महत्त्वाची आहे. देशातील सर्वात मोठी सार्वजनिक क्षेत्रातील बँक असलेली 'एसबीआय' २३ मे २०२६ पासून सलग सहा दिवस बंद राहण्याची शक्यता निर्माण झाली आहे. बँक कर्मचारी संघटनांनी पुकारलेला दोन दिवसांचा संप, वीकेंड आणि बकरीद (ईद-उल-अझहा) निमित्त असणाऱ्या सुट्ट्या यामुळे हा परिणाम होणार आहे. त्यामुळे ग्राहकांनी बँकेशी संबंधित चेक क्लिअरन्स, अकाऊंट ओपनिंग किंवा डीडी काढणे यांसारखी महत्त्वाची कामे २३ मेपूर्वीच उरकून घ्यावीत, असा सल्ला देण्यात आला आहे.

६ दिवस बँका बंद राहण्याचे वेळापत्रक:

• २३ मे (चौथा शनिवार): देशभरातील बँकांना नियमित सुट्टी.

• २४ मे (रविवार): साप्ताहिक सुट्टी.

• २५ आणि २६ मे (सोमवार व मंगळवार): 'ऑल इंडिया स्टेट बँक ऑफ इंडिया स्टाफ फेडरेशन' (AISBISF) कडून दोन दिवसांच्या देशव्यापी संपाची घोषणा.

• २७ आणि २८ मे (बुधवार व गुरुवार): बकरी ईद निमित्त आरबीआयने (RBI) जाहीर केलेली सुट्टी (विशेषतः जम्मू-काश्मीर आणि काही राज्यांमध्ये दोन्ही दिवस, तर इतर राज्यांमध्ये २७ मे रोजी बँका बंद राहतील).

कर्मचाऱ्यांनी संप का पुकारला आहे?

एसबीआय स्टाफ फेडरेशनने बँक व्यवस्थापनासमोर विविध मागण्या ठेवल्या आहेत. यामध्ये नोकऱ्यांचे आउटसोर्सिंग थांबवणे, राष्ट्रीय निवृत्तीवेतन प्रणाली (NPS) फंड व्यवस्थापकांच्या भरती प्रक्रियेतील मुद्दे, करिअर प्रोग्रेशन स्कीम, प्रलंबित करारांची अंमलबजावणी आणि एचआरएमएस (HRMS) संबंधित कर्मचाऱ्यांच्या समस्या सोडवण्याचा समावेश आहे.

डिजिटल आणि ऑनलाईन सेवांवर परिणाम नाही:

बँकेच्या शाखा बंद असल्या तरी ग्राहकांसाठी दिलासादायक बाब म्हणजे ऑनलाईन बँकिंग सेवा पूर्णपणे सुरू राहतील. इंटरनेट बँकिंग, मोबाईल बँकिंग, यूपीआय (UPI) पेमेंट आणि एटीएम (ATM) सेवा नेहमीप्रमाणे सुरळीत सुरू राहतील. त्यामुळे रोख रक्कम काढणे किंवा डिजिटल व्यवहार करण्यात कोणतीही अडचण येणार नाही.