बीड: पहिल्या श्रावण सोमवारी व नागपंचमीच्या दुर्मिळ योगावर परळीच्या वैद्यनाथ मंदिरात भाविकांची अलोट गर्दी; ३ हजार किलो फुलांची सजावट

बीड: बारा ज्योतिर्लिंगांपैकी एक असलेल्या बीड जिल्ह्यातील परळी येथील प्रभू वैद्यनाथाच्या दर्शनासाठी पहिल्या श्रावण सोमवारी आणि नागपंचमीच्या दुर्मिळ योगावर राज्यभरातून व परराज्यातूनही हजारो भाविकांची अलोट गर्दी उसळली आहे. या पवित्र दिवशी भाविकांनी प्रभू वैद्यनाथांचे दर्शन घेऊन चांगल्या पावसामुळे शेती व सुबत्ता लाभावी यासाठी साकडे घातले आहे.

यंदाच्या श्रावण महिन्यात पहिल्याच सोमवारी नागपंचमी आल्यामुळे परळीच्या वैद्यनाथ मंदिरात विशेष धार्मिक वातावरण पाहायला मिळत आहे. या पार्श्वभूमीवर मंदिर परिसर आकर्षक फुलांनी सजविण्यात आला असून, वैद्यनाथाच्या मंदिरामध्ये तब्बल ३ हजार किलो फुलांची सुंदर सजावट करण्यात आली आहे. या दुर्मिळ योगामुळे गुजरात, राजस्थान, आंध्र प्रदेश, कर्नाटक, तामिळनाडू, तेलंगणा, नवी दिल्ली यांसारख्या विविध राज्यांमधून आणि महाराष्ट्राच्या कानाकोपऱ्यातून लाखो भाविक परळीत दाखल झाले आहेत.

भाविकांना सुरळीत, सुलभ व सुरक्षित दर्शन घेता यावे यासाठी प्रभू वैद्यनाथ देवस्थान ट्रस्ट आणि प्रशासनाकडून जय्यत तयारी करण्यात आली आहे. मंदिर परिसरात महिला व पुरुषांसाठी स्वतंत्र दर्शनरांगांची व्यवस्था करण्यात आली असून, पासधारकांसाठीही स्वतंत्र रांग ठेवण्यात आली आहे. तसेच पावसापासून व उन्हापासून भाविकांचे संरक्षण व्हावे म्हणून संपूर्ण दर्शनरांगेवर वॉटरप्रूफ मंडप उभारण्यात आले आहेत.

सुरक्षेच्या दृष्टीने संपूर्ण मंदिर परिसरात १२० हून अधिक सीसीटीव्ही कॅमेरे कार्यान्वित करण्यात आले असून, अत्याधुनिक तंत्रज्ञानाद्वारे प्रत्येक हालचालीवर बारीक नजर ठेवली जात आहे. कायदा व सुव्यवस्था राखण्यासाठी आणि चोख बंदोबस्तासाठी पोलिस प्रशासनाचे पथकही तैनात करण्यात आले आहे. श्रावणातील पहिल्या सोमवारी आलेल्या या पवित्र सणामुळे परळी नगरीत भक्तिमय व उत्साहपूर्ण वातावरण निर्माण झाले आहे.