Mumbai : अशोक खरात प्रकरणात खळबळजनक आरोप; राजकीय नेते व बड्या अधिकाऱ्यांचे व्हिडिओ असल्याचा दावा, फडणवीसांचे सभागृहात स्पष्टीकरण

Mumbai : भोंदूबाबा अशोक खरात प्रकरणावरून विधानसभेत सोमवारी मोठा गदारोळ झाला. ‘या प्रकरणातील कोणालाही ‘क्लीन चिट’ दिली जाणार नाही, तसेच दोषींना कुठल्याही परिस्थितीत सोडणार नाही’, अशी स्पष्टोक्ती मुख्यमंत्री देवेंद्र फडणवीस यांनी विधानसभेत केली. शिवाय या संपूर्ण प्रकरणावर आज, मंगळवारी सभागृहात सविस्तर निवेदन करणार असल्याचेही त्यांनी सांगितले.

स्थगन प्रस्तावाद्वारे विरोधी पक्षनेते विजय वडेट्टीवार यांनी हा मुद्दा उपस्थित करत सरकारला धारेवर धरले. अशोक खरात याच्याशी संबंधित १००हून अधिक ‘व्हिडीओ क्लिप’ समोर आल्याचा दावा त्यांनी केला. या क्लिपमध्ये राजकीय व्यक्ती, ‘आयएएस’, ‘आयपीएस’ तसेच महसूल विभागातील अधिकार्‍यांचा सहभाग असल्याचा आरोप करत संबंधित सर्वांच्या कॉल डिटेल रेकॉर्ड्स (सीडीआर) तपासण्याची मागणी त्यांनी केली. यानंतर आमदार भास्कर जाधव आणि नाना पटोले यांनीही सरकारवर जोरदार टीका करत या प्रकरणामुळे राज्याची बदनामी झाल्याचे सांगितले. ‘हा महाराष्ट्राच्या प्रतिष्ठेचा प्रश्न असून, यावर सविस्तर चर्चा झाली पाहिजे’, अशी मागणी विरोधकांनी केली.

दरम्यान, मुख्यमंत्री फडणवीस यांनी सभागृहात हस्तक्षेप करत हे प्रकरण अत्यंत गंभीर असल्याचे नमूद केले. आध्यात्माच्या नावाखाली महिलांची फसवणूक करून त्यांच्यावर अत्याचार, दुष्कृत्ये झाल्याचे समोर येत असल्याचे त्यांनी सांगितले. पोलिसांनी याप्रकरणी सक्रियपणे कारवाई सुरू केली असून, सुरुवातीला तक्रार देण्यास घाबरणाऱ्या महिलांना धीर दिल्यानंतर आता त्या पुढे येत असल्याची माहिती त्यांनी दिली.

ही कारवाई अचानक झालेली नसून आधीपासूनच तयारी सुरू होती. आरोपीच्या अटकेपूर्वीच १० मार्च रोजी दुसर्‍या जिल्ह्यातील एका तक्रारीचा वापर करून आवश्यक ती ‘एलओसी’ मिळविण्यात आली होती. त्यामुळे त्याला बाहेर पळता आले नाही, असेही फडणवीस यांनी सांगितले. या प्रकरणाचा तपास सुरू आहे. त्यामुळे याबाबतची सविस्तर माहिती आज, मंगळवारी सभागृहासमोर मांडण्यात येईल, असे फडणवीस म्हणाले.

‘माझ्यात वेगळी शक्ती आहे’, असे महिलांना सांगून त्यांचा दुरुपयोग करणे आणि त्या जे काही समर्पण करत आहेत, तेच त्यांचे इतिकर्तव्य आहे, अशा पद्धतीने त्यांचे ‘ब्रेन वॉशिंग’ करणे, अशा अनेक गोष्टी यामध्ये झाल्या आहेत, असंही मुख्यमंत्र्यांनी सांगितलं.

दरम्यान, या प्रकरणात गुन्हा दाखल झाला असून, तपास सुरू असल्याची माहिती विधानसभा अध्यक्ष राहुल नार्वेकर यांनी दिली. मात्र, विरोधकांच्या आक्रमक भूमिकेमुळे सभागृहात काही काळ गोंधळाचे वातावरण निर्माण झाले. मुख्यमंत्र्यांनी निवेदन दिल्यानंतरच पुढील कामकाज सुरू झाले.