पुणे: तुकाराम मुंढेंचा आता पुण्याकडे मोर्चा! भेसळयुक्त पनीर आणि खव्याचा ४७ लाखांचा साठा जप्त, राज्यभरात १९२ जणांना अटक.

पुणे: अन्न व औषध प्रशासनाची राज्यभर 'धडक कारवाई'अन्न व औषध प्रशासन (FDA) विभागाचे नवनियुक्त आयुक्त तुकाराम मुंढे यांनी पदभार स्वीकारताच भेसळखोरांविरुद्ध कठोर पवित्रा घेतला आहे. मागील पाच दिवसांत (१ जून ते ५ जून २०२६) राज्यभरात राबवण्यात आलेल्या विशेष मोहिमेत तब्बल १.९९ कोटी रुपयांचा प्रतिबंधित अन्नपदार्थ आणि भेसळयुक्त साठा जप्त करण्यात आला असून, या प्रकरणी एकूण १९२ जणांना बेड्या ठोकण्यात आल्या आहेत.

पुण्यात मोठी कारवाई:आयुक्त तुकाराम मुंढे यांच्या मार्गदर्शनाखाली पुणे एफडीए विभागाने शहरातील १७ वेगवेगळ्या ठिकाणी एकाच वेळी छापेमारी केली. या कारवाईत सुमारे ४७ लाख ३६ हजार १८ रुपये किमतीचा संशयित खवा, पनीर, चीज ॲनालॉग (वनस्पतीजन्य तेल वापरून तयार केलेले चीज) आणि तूप जप्त
करण्यात आले आहे. जनतेच्या आरोग्याशी खेळणाऱ्या अशा भेसळखोरांवर आता थेट न्यायालयीन कारवाई केली जाणार असल्याचे प्रशासनाने स्पष्ट केले आहे.

कारवाईचा आढावा (५ दिवसांची आकडेवारी):

एकूण धाडी: १९५   एकूण अटक: १९२  दाखल गुन्हे (FIR): १२३  जप्त साठा: सुमारे २ कोटी रुपये

मुंढेंचा इशारा: "जनतेच्या आरोग्याशी खेळ करणाऱ्या कोणत्याही व्यक्तीला किंवा आस्थापनेला माफी दिली जाणार नाही," असा इशारा तुकाराम मुंढे यांनी दिला आहे. राज्यात प्रतिबंधित गुटखा, पानमसाला आणि भेसळयुक्त खाद्यपदार्थांविरोधात ही मोहीम अधिक तीव्र आणि सातत्यपूर्ण राहील, असेही त्यांनी सांगितले. एफडीएने नागरिकांना आवाहन केले आहे की, भेसळयुक्त खाद्यपदार्थ किंवा संशयास्पद विक्रीबाबत काही तक्रार असल्यास त्यांनी १८००२२२३६५ या टोल-फ्री क्रमांकावर संपर्क साधावा.