'मी मुंबईत नसणार, पण...'; वाढदिवसानिमित्त राज ठाकरेंचे मनसैनिकांना अनोखे आवाहन; होर्डिंग्स नको, झाडे लावा!

मुंबई: महाराष्ट्र नवनिर्माण सेनेचे (MNS) अध्यक्ष राज ठाकरे यांचा वाढदिवस १४ जून रोजी असतो. दरवर्षी या दिवशी राज ठाकरे यांना शुभेच्छा देण्यासाठी राज्यभरातून हजारो कार्यकर्ते आणि चाहते मुंबईतील त्यांच्या 'शिवतीर्थ' या निवासस्थानी गर्दी करत असतात. मात्र, यावर्षी राज ठाकरे यांनी आपल्या वाढदिवसाच्या निमित्ताने एक अत्यंत महत्त्वाचे आणि वेगळे आवाहन कार्यकर्त्यांना केले आहे.

काय आहे राज ठाकरेंचे आवाहन?
राज ठाकरे यांनी समाज माध्यमावर (X) पोस्ट करत स्पष्ट केले आहे की, १४ जून या दिवशी ते मुंबईत नसणार आहेत, त्यामुळे कार्यकर्त्यांची भेट होऊ शकणार नाही. दरवर्षी कार्यकर्ते मोठ्या उत्साहात होर्डिंग्स लावतात, केक आणि मिठाई घेऊन येतात, पण यावर्षी त्यांनी या सर्व गोष्टींना फाटा देण्याचे आवाहन केले आहे.

होर्डिंग्सपेक्षा निसर्गाला प्राधान्य:
राज ठाकरे यांनी कार्यकर्त्यांना विनंती केली आहे की, "शुभच्छांचे होर्डिंग्स लावून शहरं रंगवण्याऐवजी, यावर्षी माझा वाढदिवस लोकोपयोगी उपक्रमातून साजरा करा." त्यांनी कार्यकर्त्यांना फुलांची, फळांची किंवा दीर्घकाळ टिकतील अशी झाडे परिसरात लावण्याचे आवाहन केले आहे. केवळ झाडे लावू नका, तर ती जगवा आणि त्यांची काळजी घ्या, असेही त्यांनी नमूद केले आहे.

पाणवठ्यांची निर्मिती:
झाडांसोबतच भटक्या प्राणी आणि पक्ष्यांसाठी जंगलांच्या कडेला आणि शहरांमध्येही पाणवठे उभारण्याचे आवाहन त्यांनी केले आहे. हे पाणवठे केवळ उभारून थांबू नका, तर त्यात नियमित पाणी असेल याची काळजी घ्या, अशी ताकीदही त्यांनी दिली. "मला लाईक्स आणि व्ह्यूज नकोत, तर झाडे लावून निसर्गाचे आणि लोकांचे आशीर्वाद मिळवावेत," अशी भावनिक साद त्यांनी आपल्या कार्यकर्त्यांना घातली आहे.

राज ठाकरे यांच्या या आवाहनाचे सर्वस्तरातून कौतुक होत असून, मनसैनिक आता मोठ्या प्रमाणावर वृक्षारोपण आणि जलसंधारणाच्या कामात सहभागी होण्यासाठी सज्ज झाले आहेत.

 

सविस्तर वाचा, लिंक कमेंट मध्ये  https://punenews24.in/