पुण्यात पाण्यासाठी महिलांचा संताप अनावर! घोरपडी परिसरातील भीमनगरमध्ये जोरदार 'रास्ता रोको'

पुणे शहरात सध्या लागू करण्यात आलेल्या एक दिवसाआड पाणीपुरवठ्यामुळे नागरिकांचे प्रचंड हाल होत आहेत. यातच घोरपडी परिसरातील भीमनगरमध्ये पाणीटंचाईची समस्या अधिकच गंभीर बनली आहे. अपुऱ्या आणि कमी दाबाने होणाऱ्या पाणीपुरवठ्यामुळे संतप्त झालेल्या भीमनगर येथील स्थानिक महिलांनी शुक्रवारी रस्त्यावर उतरून तीव्र संताप व्यक्त केला आणि 'रास्ता रोको' आंदोलन केले.

 

 

गेल्या काही दिवसांपासून भीमनगर परिसरात पिण्याच्या पाण्याचा गंभीर प्रश्न निर्माण झाला आहे. वारंवार मागणी करूनही प्रशासनाकडून योग्य पाणीपुरवठा होत नसल्याने महिलांचा संयम सुटला. शुक्रवारी शेकडो महिलांनी रिकामे हंडे आणि कळश्या घेऊन मुख्य रस्त्यावर ठिय्या मांडला आणि वाहतूक अडवून धरली.

प्रशासनाविरोधात जोरदार घोषणाबाजी

आंदोलक महिलांनी महापालिका आणि स्थानिक प्रशासनाविरोधात जोरदार घोषणाबाजी केली. "आधी पाणी द्या, मगच रस्ता सोडणार," अशी आक्रमक भूमिका महिलांनी घेतली होती. या अचानक केलेल्या रास्ता रोकोमुळे घोरपडी परिसरातील वाहतूक काही काळासाठी पूर्णपणे कोलमडली होती आणि वाहनांच्या लांबच लांब रांगा लागल्या होत्या.

तातडीने कारवाईची मागणी

घटनेची माहिती मिळताच स्थानिक पोलीस आणि संबंधित विभागाचे अधिकारी घटनास्थळी दाखल झाले. त्यांनी आंदोलक महिलांशी संवाद साधून समजूत काढण्याचा प्रयत्न केला. जोपर्यंत भीमनगर परिसरात नियमित आणि पुरेशा दाबाने पाणीपुरवठा सुरू केला जात नाही, तोपर्यंत आंदोलन मागे घेणार नसल्याचा इशारा महिलांनी दिला. अखेर प्रशासकीय अधिकाऱ्यांनी पाणी समस्या लवकरात लवकर सोडवण्याचे ठोस आश्वासन दिल्यानंतर महिलांनी आंदोलन मागे घेतले.

 

सविस्तर वाचा, लिंक कमेंट मध्ये https://punenews24.in/