NCP President : अजितदादांनंतर राष्ट्रवादीची धुरा कोणाकडे? मोठी अपडेट समोर

राष्ट्रवादी काँग्रेसचे नेते अजित पवार यांच्या निधनानंतर महाराष्ट्राच्या राजकारणात मोठ्या घडामोडींना वेग आला आहे. अजित दादांची राजकीय वारसदार म्हणून आता सुनेत्रा पवार यांच्याकडे पक्षाची आणि प्रशासनाची धुरा सोपवण्याची शक्यता आली आहे. पुण्याच्या पालकमंत्री म्हणून सुनेत्रा पवार यांची पहिलीच जिल्हा नियोजन समितीची (DPDC) बैठक पार पडणार आहे. याच काळात त्यांची राष्ट्रवादी काँग्रेस अजित पवार गटाच्या राष्ट्रीय अध्यक्षपदी निवड होणार असल्याची दाट शक्यता वर्तवण्यात येत आहे.

अजित पवार यांच्या अकाली निधनानंतर रिक्त झालेल्या पक्षाच्या सर्वोच्च पदाची धुरा आता सुनेत्रा पवार यांच्याकडे सोपवण्यात येण्याची शक्यता आहे. पक्षाच्या राष्ट्रीय कार्यकारिणीच्या बैठकीत हा ऐतिहासिक निर्णय घेण्यात येण्याची शक्यता आहे. अजित दादांच्या निधनानंतर पुणे जिल्ह्याच्या विकासाचा गाडा पुढे नेण्यासाठी सुनेत्रा पवार आता सक्रिय झाल्या आहेत. पुण्याच्या पालकमंत्री म्हणून त्या आज आपली पहिली अधिकृत DPDC बैठक घेणार आहेत. या बैठकीसाठी जिल्ह्यातील सर्व आमदार आणि खासदारांना निमंत्रण देण्यात आले आहे.

या बैठकीत जिल्ह्याच्या आगामी वर्षाच्या विकासकामांच्या निधीवर चर्चा होणार आहे. पालकमंत्री म्हणून आपली पहिलीच बैठक असल्याने सुनेत्रा पवार प्रशासकीय पातळीवर आपली छाप कशी पाडतात, याकडे सर्वांचे लक्ष लागले आहे.

पक्षाची धुरा सुनेत्रा पवारांकडे?

सूत्रांनी दिलेल्या माहितीनुसार, राष्ट्रवादी काँग्रेसच्या राष्ट्रीय अध्यक्षपदी सुनेत्रा पवार यांची वर्णी लागण्याचे जवळपास निश्चित झाले आहे. या निर्णयावर अधिकृत शिक्कामोर्तब करण्यासाठी लवकरच राष्ट्रवादी काँग्रेसच्या राष्ट्रीय कार्यकारिणीची महत्त्वाची बैठक बोलावण्यात येणार आहे. अजित दादांच्या निधनानंतर पक्षात निर्माण झालेली पोकळी भरून काढण्यासाठी आणि कार्यकर्त्यांना एकसंध ठेवण्यासाठी सुनेत्रा पवार यांचा चेहरा महत्त्वाचा मानला जात आहे.

राजकीय वर्तुळात चर्चा

सुनेत्रा पवार यांनी यापूर्वी बारामतीमध्ये संघटनात्मक पातळीवर मोठे काम केले आहे. मात्र, आता थेट जिल्ह्याचे पालकमंत्रीपद आणि पक्षाचे राष्ट्रीय अध्यक्षपद अशा दोन मोठ्या जबाबदाऱ्या त्यांच्यासमोर असणार आहेत. आज होणारी DPDC ची बैठक ही त्यांच्या या नव्या राजकीय प्रवासाची पहिली पायरी मानली जात आहे.

[embedded content]