Pune Shocker: Vegetable Seller Fakes Selection into Police Force to Get Better Marriage Proposals; Arrested After Putting Up Grand Flex Banners

पुणे: लग्नासाठी चांगलं स्थळ मिळावं किंवा आईचा आनंद पाहता यावा, या उद्देशाने पुण्यातील एका तरुणाने आपण पोलीस दलात भरती झाल्याचा मोठा बनाव रचला. मात्र, त्याचा हा उत्साह त्याला चांगलाच महागात पडला असून, नऱ्हे पोलिसांनी त्याच्या या 'खाकी' स्वप्नाचा पर्दाफाश केला आहे.

नेमका प्रकार काय?
सिंहगड रस्ता परिसरातील नऱ्हे येथील ऋषिकेश राजू जाधव (२६) हा तरुण भाजीपाला विक्रीचा व्यवसाय करतो. त्याला पोलीस व्हायचे होते, पण उंची कमी असल्याने त्याचे हे स्वप्न पूर्ण होऊ शकले नाही. दरम्यान, घरच्यांनी त्याच्या लग्नासाठी तगादा लावला होता. जर आपण पोलीस आहोत असे सांगितले तर चांगली मुलगी मिळेल, या विचाराने त्याने आपण 'पुणे पोलीस' दलात भरती झाल्याची खोटी बातमी घरी दिली.

स्वतःचेच लावले भव्य फ्लेक्स:
ऋषिकेश एवढ्यावरच थांबला नाही, तर त्याने आपल्या सोसायटीत पेढे वाटले आणि चक्क परिसरात स्वतःच्या फोटोसह "पुणे पोलीस पदी निवड" झाल्याचे भव्य फ्लेक्स लावले. त्याने व्हॉट्सॲपवर पोलीस वर्दीतील फोटो स्टेटस म्हणून ठेवले होते. आपल्या भागातील मुलगा पोलीस झाला म्हणून नऱ्हे पोलीस स्टेशनचे अधिकारी त्याचे अभिनंदन करण्यासाठी त्याच्या घरी पोहोचले.

पोलिसांनी चौकशी करताच फुटला घाम:
जेव्हा पोलिसांनी त्याच्या नियुक्ती पत्राची आणि कागदपत्रांची विचारपूस केली, तेव्हा ऋषिकेशची बोबडी वळली. त्याने कोणतीही परीक्षा दिली नसल्याचे आणि तो पोलीस नसल्याचे समोर आले. अधिकृत अधिकार नसताना पोलीस असल्याचे भासवणे आणि महाराष्ट्र पोलिसांच्या चिन्हाचा गैरवापर केल्याप्रकरणी पोलिसांनी त्याच्यावर BNS कलम २०४ अंतर्गत गुन्हा दाखल केला आहे.

पोलिसांचा संदेश:
"पोलीस भरती होणे हे मेहनतीचे आणि सन्मानाचे काम आहे. अशा प्रकारे खोट्या प्रसिद्धीसाठी वर्दीचा अपमान करणे गुन्हा आहे," असे पोलिसांनी स्पष्ट केले आहे. लग्नासाठी केलेला हा खोटा बनाव आता ऋषिकेशला पोलीस कोठडीची हवा खाण्यास कारणीभूत ठरला आहे.