पुण्यातून थेट हरियाणा गाठलं! गणेशोत्सवात भाविकांचे सोन्याचे दागिने लुटणाऱ्या टोळीचा पर्दाफाश; ४,६०० किमी पाठलाग करून तिघे गजाआड!

पुणे: पुण्यातील प्रसिद्ध गणेशोत्सव आणि विसर्जन मिरवणुकीदरम्यान गर्दीचा फायदा घेऊन भाविकांचे महागडे सोन्याचे दागिने आणि मोबाईल संच लांबवणाऱ्या एका आंतरराज्यीय अट्टल टोळीचा विश्रामबाग पोलिसांनी पर्दाफाश केला आहे. पोलिसांनी तब्बल ४,६०० किलोमीटरचा प्रवास आणि पाठलाग करून गुजरात व हरियाणा पोलिसांच्या मदतीने हरियाणातील पलवल भागातून तिघा आरोपींना अटक केली आहे. आरोपींकडून १३ लाख रुपयांचे सोन्याचे दागिने आणि गुन्ह्यात वापरलेली आलिशान कार असा एकूण २३ लाख रुपयांचा मुद्देमाल जप्त करण्यात आला असून एकूण ९ गुन्हे उघडकीस आले आहेत.

४,६०० किलोमीटरचा थरारक पाठलाग

गणेशोत्सवाच्या काळात विसर्जन मिरवणूक आणि देखावे पाहण्यासाठी आलेल्या हजारो भाविकांचे सोन्याचे दागिने व मोबाईल चोरीला गेल्याच्या तक्रारी विश्रामबाग पोलीस ठाण्यात दाखल झाल्या होत्या. पोलीस उपायुक्त कृषीकेश रावले यांच्या मार्गदर्शनाखाली वरिष्ठ पोलीस निरीक्षक नवनाथ जगताप आणि त्यांच्या पथकाने परिसरातील शेकडो सीसीटीव्ही फुटेजची तपासणी केली आणि तांत्रिक विश्लेषणाचा (Technical Analysis) आधार घेतला.

तपासादरम्यान पोलिसांना सुगावा लागला की, ही टोळी लक्झरी कारने पुण्यात आली होती आणि चोरी करून थेट परराज्यात पसार झाली आहे. यातील एक आरोपी गुजरातमधील अरवली येथे दाखल गुन्ह्यात पकडला गेल्याची माहिती मिळताच विश्रामबाग पोलिसांचे पथक तेथे पोहोचले. आरोपीच्या चौकशीतून मिळालेल्या माहितीच्या आधारे पोलिसांनी गुजरात ते हरियाणा असा तब्बल साडेचार हजार किलोमीटरचा प्रवास करून पलवल (हरियाणा) येथील गावात छापा टाकला आणि तीन मुख्य आरोपींना ताब्यात घेतले.

अटक करण्यात आलेले आरोपी

1. अजय समशेर ऊर्फ विनोदकुमार रूपसिंग कोळी (वय २०, रा. समसाबाद, पलवल, हरियाणा)

2. अमन समशेर ऊर्फ अनिलकुमार नारायणसिंग कोळी (वय २४, रा. आदर्श कॉलनी, पलवल, हरियाणा)

3. दीपक समशेर ऊर्फ राजूभाई सापसिंग (वय २१, रा. हिरानगर कॉलनी, पलवल, हरियाणा)

पोलीस तपासात या टोळीने गणेशोत्सवात गर्दीचा गैरफायदा घेऊन एकापाठोपाठ एक चोऱ्या केल्याची कबुली दिली आहे. विश्रामबाग पोलिसांच्या या धडक आणि धाडसी कारवाईमुळे पुणे पोलीस दलाचे कौतुक होत आहे.