Pune : नववर्षाच्या सुरुवातीलाच पुणेकरांना दिलासा; सहा पदरी उड्डाणपूल आणि 24 किमीचा उन्नत मार्ग—कुठून कुठे जोडणार नवे रस्ते?

Pune : नववर्षाच्या सुरुवातीलाच पुणेकरांसाठी दिलासादायक बातमी समोर आली आहे. 2025 मध्ये मंजुरी मिळालेल्या पुणे जिल्ह्यातील दोन महत्त्वाच्या रस्ते प्रकल्पांवर यंदा प्रत्यक्ष काम सुरू होणार असल्याची माहिती मिळाली आहे. कायमस्वरूपी वाहतूक कोंडीमुळे त्रस्त असलेल्या पुणेकरांसाठी हे दोन्ही प्रकल्प अत्यंत महत्त्वाचे ठरणार आहेत.

महाराष्ट्र राज्य पायाभूत सुविधा विकास महामंडळ (MSIDC) तर्फे पुणे जिल्ह्यात दोन मोठ्या रस्ते प्रकल्पांचे काम हाती घेण्यात आले आहे. यामध्ये पुण्यातील वाहतुकीच्या दृष्टीने अतिशय महत्त्वाच्या दोन मार्गांचा समावेश असून, या प्रकल्पांमुळे शहरातील तसेच शहराबाहेरील प्रवास अधिक वेगवान आणि सुरळीत होणार आहे.

Pune : पुणेकरांसाठी मोठा बदल! 60 नवीन रेल्वे, नवे प्लॅटफॉर्म आणि टर्मिनलसह प्रवास होणार अधिक सुखकर – जाणून घ्या कुठे काय बदल होणार

पहिला मार्ग कुठे?
नागपूर येथे झालेल्या हिवाळी अधिवेशनात मुख्यमंत्री देवेंद्र फडणवीस यांनी हडपसर–यवत मार्गाच्या वाढीला मंजुरी दिली होती. या प्रकल्पांतर्गत हडपसरमधील भैरोबा नाळा ते यवत दरम्यान सहा पदरी उड्डाणपूल बांधण्यात येणार आहे. या उड्डाणपुलाला जून 2025 मध्ये मंजुरी देण्यात आली होती. पुणे–सोलापूर महामार्गावर होणारी तीव्र वाहतूक कोंडी कमी करण्यासाठी ही योजना आखण्यात आली आहे. या प्रकल्पासाठी एकूण 5,262 कोटी रुपयांचा खर्च मंजूर करण्यात आला होता. मात्र, जून महिन्यात या प्रकल्पाच्या वाढीला मंजुरी देण्यात आल्याने उड्डाणपुलाची लांबी सुमारे 4.5 किलोमीटरने वाढणार आहे.

दुसरा मार्ग कुठे जोडणार?
यासोबतच तळेगाव–चाकण–शिक्रापूर महामार्गाच्या बांधकामालाही याच वर्षात सुरुवात होणार आहे. लवकरच या प्रकल्पाचे प्रत्यक्ष काम सुरू होण्याची शक्यता आहे. तळेगाव–चाकण–शिक्रापूर हा राष्ट्रीय महामार्ग क्रमांक 548 डी असून, पुणे शहर आणि शहराबाहेरील औद्योगिक व मालवाहतूक यासाठी हा मार्ग अत्यंत महत्त्वाचा आहे. या महामार्गाची दुरुस्ती आणि सुधारणा दोन टप्प्यांमध्ये करण्यात येणार आहे. एकूण 53.2 किलोमीटर लांबीच्या या मार्गापैकी 24.2 किलोमीटरचा भाग हा उन्नत (elevated) मार्ग असणार आहे.

या दोन्ही महत्त्वाच्या प्रकल्पांना गेल्या वर्षी मंजुरी मिळाली असून, सध्या त्यांची निविदा प्रक्रिया अंतिम टप्प्यात आहे. संबंधित प्रस्ताव राज्य सरकारकडे मंजुरीसाठी पाठवण्यात आले आहेत. प्रस्तावाला अंतिम मंजुरी मिळताच या दोन्ही मार्गांच्या कामाला सुरुवात केली जाणार आहे. MSIDC कडून नियोजन पूर्ण करण्यात आले असून, येत्या दोन महिन्यांत या रस्त्यांच्या कामाला प्रत्यक्ष सुरुवात होण्याची शक्यता आहे. या दोन्ही प्रकल्पांचे कंत्राट मोंटेकार्लो लिमिटेड या कंपनीला देण्यात आले आहे.