उत्तर पुणे जिल्ह्याला मोठा धक्का! प्रस्तावित पुणे-मंचर-नाशिक रेल्वे मार्ग रद्द; केंद्रीय रेल्वेमंत्र्यांच्या घोषणेनंतर नागरिकांमध्ये तीव्र संताप

मंचर (पुणे): उत्तर पुणे जिल्ह्यातील आंबेगाव, खेड आणि जुन्नर तालुक्यातून प्रस्तावित असलेला बहुप्रतीक्षित पुणे–मंचर–नाशिक हायस्पीड रेल्वे मार्ग रद्द करण्यात आला आहे. हा रेल्वे मार्ग आता अन्य पर्यायी मार्गाने नेण्यात येणार असून, प्रस्तावित जुना रेल्वे मार्ग रद्द झाल्याचे अधिकृत वृत्त केंद्रीय रेल्वेमंत्री अश्विनी वैष्णव यांनी पुण्यात आयोजित पत्रकार परिषदेत जाहीर केले. केंद्र सरकारच्या या अनपेक्षित निर्णयामुळे चाकण विमानतळ प्रकल्पानंतर आता उत्तर पुणे जिल्ह्यातून जाणारा अत्यंत महत्त्वाचा रेल्वे मार्गही हिरावला गेल्याने स्थानिक नागरिक, शेतकरी, उद्योजक आणि भाविकांमध्ये तीव्र संतापाची लाट पसरली आहे.

तीन दशकांचे स्वप्न भंगले, व्यापारी व शेतकऱ्यांचे मोठे नुकसान:

गेल्या तीन दशकांहून अधिक काळापासून खेड, आंबेगाव आणि जुन्नर तालुक्यातील जनता पुणे-नाशिक रेल्वेमार्गाची प्रतीक्षा करत होती. या रेल्वे प्रकल्पामुळे नारायणगाव, मंचर, राजगुरुनगर यांसारख्या मोठ्या बाजारपेठांना गती मिळणार होती. तसेच जुन्नर येथील लेण्याद्री, ओझर हे अष्टविनायक क्षेत्र आणि शिवनेरी किल्ल्यावर येणाऱ्या लाखो भाविकांचा प्रवास सुकर होणार होता. मात्र, रेल्वे मार्ग इतरत्र वळवण्याच्या आणि जुना मार्ग रद्द करण्याच्या रेल्वेमंत्र्यांच्या घोषणेमुळे या संपूर्ण परिसरातील विकासाच्या आशेवर पाणी फिरले आहे.

अलाइनमेंट बदलल्याने गुप्त मोजणी सुरू:

दरम्यान, रेल्वेचा नवा अलाइनमेंट (पर्यायी मार्ग) नेमका कुठून जाणार याबाबत गुप्त मोजणी सुरू झाली असून सिन्नर आणि इतर परिसरांमध्ये खांब रोवून सर्वेक्षण केले जात आहे. यामुळे जमिनी जाण्याच्या भीतीने शेतकरी आणि जमीनधारकांमध्ये आधीच संभ्रमाचे वातावरण निर्माण झाले आहे. चाकण आंतरराष्ट्रीय विमानतळ प्रकल्प आधीच रद्द झाल्यानंतर, आता हक्काचा रेल्वे प्रकल्पही उत्तर पुणे जिल्ह्यातून रद्द झाल्याने स्थानिक लोकप्रतिनिधी आणि नागरिकांनी केंद्र सरकारविरोधात आक्रमक पवित्रा घेण्याची तयारी सुरू केली आहे.