Pune Crime : पुण्यात कोयता गँगचं ‘लेडी डॉन’ व्हर्जन; बी. टी. कवडे रोडवर तरुणीसह टोळक्याचा थरार, हडपसरमध्ये खळबळ

Pune : पुण्यातून एक धक्कादायक घडामोड समोर आली आहे. आता शहराच्या पूर्व भागात पुन्हा एकदा गुंडगिरीने डोके वर काढले असून, हडपसरमधील बी. टी. कवडे रोडवर शनिवारी रात्री एका शस्त्रधारी टोळक्याने अक्षरशः धुमाकूळ घातला. या घटनेमुळे स्थानिक रहिवाशांची झोप उडाली असून, परिसरात भीतीचे सावट पसरले आहे.

रात्रीच्या शांत वेळेत अचानक आरडाओरडा करत आलेल्या चार तरुण आणि एका तरुणीने हातात धारदार हत्यारे घेऊन रस्त्यावर नंगानाच सुरू केला. तोंडाला कापड बांधून आलेल्या या हल्लेखोरांनी दिसेल त्याला धमकावत आणि शस्त्रांचा धाक दाखवत दहशत निर्माण करण्याचा प्रयत्न केला. या अनपेक्षित प्रकारामुळे रस्त्यावरून जाणाऱ्या पादचाऱ्यांची आणि वाहनचालकांची भंबेरी उडाली, ज्यांना जिकडे वाट मिळेल तिकडे त्यांनी पळ काढला.

Jejuri : खंडोबा गडाच्या पायथ्याशी गोंधळ; चपला ठेवण्याच्या किरकोळ वादातून भाविकांचा दुकानदारावर जीवघेणा हल्ला, दुकानाची तोडफोड

केवळ धमकावून हे टोळके थांबले नाही, तर त्यांनी आपला मोर्चा व्यावसायिक प्रतिष्ठानांकडे वळवला. रस्त्यालगत असलेल्या अर्ध्या डझन दुकानांवर त्यांनी कोयत्याने सपासप वार करत शटर आणि काचा फोडल्या. तसेच रस्त्याच्या कडेला पार्क केलेल्या अनेक दुचाकी आणि चारचाकी गाड्यांचेही मोठे नुकसान केले. या तोडफोडीमुळे व्यापाऱ्यांचे आणि वाहनमालकांचे मोठे आर्थिक नुकसान झाले आहे.

या घटनेतील सर्वात अस्वस्थ करणारी बाब म्हणजे या टोळक्यामध्ये एका तरुणीचा असलेला सक्रिय सहभाग. आतापर्यंत पुण्यातल्या ‘कोयता गँग’मध्ये केवळ तरुण मुलांचा समावेश पाहायला मिळत होता. मात्र, एका महिलेने हातात शस्त्र घेऊन तोडफोड केल्याचे समोर आल्याने गुन्हेगारी विश्वातील ही बदलती प्रवृत्ती पोलिसांसह समाजमन सुन्न करणारी आहे.

भरवस्तीत घडलेल्या या प्रकारामुळे हडपसर भागातील कायदा आणि सुव्यवस्थेवर प्रश्नचिन्ह निर्माण झाले आहे. पोलिसांनी या प्रकरणाची गंभीर दखल घेतली असून, परिसरातील सीसीटीव्ही फुटेजच्या आधारे आरोपींची ओळख पटवण्याचे काम युद्धपातळीवर सुरू आहे. तरीही, या घटनेमुळे पुणेकरांच्या मनात सुरक्षिततेबाबत पुन्हा एकदा संभ्रम निर्माण झाला आहे.