Pune : बारामती पोटनिवडणूक बिनविरोध नाहीच! बड्या नेत्याची उमेदवार देण्याची घोषणा

Pune : बारामती विधानसभेची पोटनिवडणूक बिनविरोध करण्याचे प्रयत्न सुरू असतानाच राजकीय समीकरणांना मोठा ट्विस्ट मिळाला आहे. ओबीसी नेते लक्ष्मण हाके यांनी बारामतीत उमेदवार देणार असल्याची घोषणा केली असून, त्यामुळे ही निवडणूक आता रंगतदार होण्याची चिन्हे आहेत.

अजित पवार यांच्या निधनानंतर बारामती विधानसभेची जागा रिक्त झाली आहे. निवडणूक आयोगाने या जागेसाठी पोटनिवडणूक जाहीर केली असून, २३ एप्रिल रोजी मतदान तर ४ मे रोजी मतमोजणी होणार आहे.

दरम्यान, ही निवडणूक बिनविरोध व्हावी यासाठी प्रयत्न सुरू असल्याची चर्चा होती. मात्र लक्ष्मण हाके यांच्या घोषणेमुळे हे समीकरण आता बदलण्याची शक्यता आहे.
“बारामतीत आम्ही निवडणूक लढणारच” – लक्ष्मण हाके

या संदर्भात बोलताना लक्ष्मण हाके म्हणाले,
“आम्ही बारामती विधानसभा पोटनिवडणूक लढवणार आहोत. योग्य वेळी उमेदवार जाहीर करू. अनेक पक्ष आमच्या संपर्कात आहेत. काही राष्ट्रीय पक्षसुद्धा इच्छुक आहेत. चर्चा सुरू आहेत, पण काहीही झालं तरी आम्ही ही निवडणूक लढणारच.”

-“लोकशाहीसाठी निवडणूक आवश्यक”
हाके यांनी यापूर्वी झालेल्या पोटनिवडणुकांचा उल्लेख करत म्हटलं,
“महाराष्ट्रात याआधीही अनेक ठिकाणी पोटनिवडणुका झाल्या आहेत. एखाद्या नेत्याच्या निधनानंतरही निवडणुका झालेल्या आहेत. लोकशाही टिकवायची असेल तर निवडणुका होणं गरजेचं आहे. बिनविरोध निवडणुका होणं लोकशाहीसाठी घातक ठरू शकतं.” दोन दिवसांत उमेदवार जाहीर पुढे बोलताना ते म्हणाले,“आम्ही रस्त्यावर लढणारे कार्यकर्ते आहोत. लोकशाही प्रक्रियेत सहभागी होणार आहोत. जनता ठरवेल काय योग्य आहे. येत्या दोन दिवसांत उमेदवाराची घोषणा करू. बारामतीची निवडणूक आम्ही पूर्ण ताकदीने लढवणार आहोत.

सुनेत्रा पवारांबाबतही विधान
हाके यांनी सुनेत्रा पवार यांच्याबाबतही मत व्यक्त करत म्हटलं,
“त्यांना बिनविरोध विधान परिषदेत पाठवावं. आणि सत्ताधाऱ्यांनी आपला कार्यकर्ता निवडणुकीत उतरवावा. विविध पक्ष आमच्या भूमिकेशी सहमत आहेत. बारामतीत ओबीसी मतदार एकत्र आले तर मोठं राजकीय चित्र बदलू शकतं.”बारामतीची पोटनिवडणूक बिनविरोध होणार अशी चर्चा असतानाच आता ती थेट लढतीत जाण्याची शक्यता वाढली आहे. पुढील दोन दिवसांत उमेदवार जाहीर झाल्यानंतर या निवडणुकीचं चित्र अधिक स्पष्ट होणार आहे.