छत्रपती संभाजीनगर: आधी जीआर, मगच माघार!; सुधारित वेतनश्रेणीसाठी राज्यातील ३४ हजार न्यायालयीन कर्मचारी बेमुदत संपावर, कामकाज ठप्प

छत्रपती संभाजीनगर: उच्च न्यायालयातील कर्मचाऱ्यांप्रमाणे दुय्यम न्यायालयातील कर्मचाऱ्यांनाही सुधारित वेतनश्रेणी लागू करावी, या मागणीसाठी राज्यातील सुमारे ३४ हजार न्यायालयीन कर्मचाऱ्यांनी आज, मंगळवारपासून (दि. १७) बेमुदत संप पुकारला आहे. यासंदर्भातील प्रस्ताव उच्च न्यायालयाने शासनाकडे पाठवूनही त्यावर निर्णय झालेला नाही. वारंवार पाठपुरावा करूनही शासन दखल घेत नसल्याने आता संपाचा निर्णय घेण्यात आल्याचे कर्मचारी संघटनांनी स्पष्ट केले. शासन निर्णय जारी झाल्याशिवाय माघार घेणार नसल्याची भूमिका त्यांनी घेतली आहे.


सुधारित वेतनश्रेणी लागू करा
उच्च न्यायालय आणि दुय्यम न्यायालयातील कर्मचाऱ्यांचे वेतन २००६ पर्यंत समान होते. मात्र, २०२३ मध्ये उच्च न्यायालयातील कर्मचाऱ्यांसाठी सुधारित वेतनश्रेणी लागू करण्यात आली. मुंबई उच्च न्यायालय तसेच नागपूर आणि औरंगाबाद खंडपीठातील कर्मचाऱ्यांना या वेतनवाढीचा लाभ दिला. त्याच धर्तीवर दुय्यम न्यायालयातील कर्मचाऱ्यांनाही सुधारित वेतनश्रेणी लागू होणे अपेक्षित होते. मात्र, शासनाने याबाबत निर्णय घेतला नसल्याने दोन्ही संवर्गांमध्ये वेतनाची तफावत निर्माण झाली आहे.

दुय्यम न्यायालयीन कर्मचाऱ्यांच्या वेतनश्रेणीसंदर्भात उच्च न्यायालयाने न्यायमूर्तीची समिती गठित केली होती. या समितीच्या शिफारशीनुसार ३१ जानेवारी २०२५ रोजी सुधारित वेतनश्रेणीचा प्रस्ताव राज्य शासनाकडे पाठविला. मात्र, अद्याप त्यावर निर्णय झालेला नाही. त्यामुळे महाराष्ट्र राज्य न्यायालयीन कर्मचारी महासंघ गट-क, लघुलेखक, बेलीफ, वाहनचालक आणि चतुर्थश्रेणी कर्मचारी संघटनांनी एकत्रितपणे संपात सहभागी होण्याचा निर्णय घेतला.


'आधी जीआर, मगच माघार'
औरंगाबाद जिल्हा न्यायालयीन कर्मचारी संघटनेचे अध्यक्ष विजयकुमार दांडगे, सचिव मोहम्मद रियाजोद्दीन गाझी, मार्गदर्शक बाळासाहेब चव्हाण यांच्यासह विविध कर्मचारी संघटनांच्या पदाधिकाऱ्यांनी 'आधी जीआर, मगच माघार' अशी भूमिका कर्मचाऱ्यांनी घेतली आहे.

निवृत्त कर्मचारीही आंदोलनात
राज्यातील सुमारे पाच हजार सेवानिवृत्त न्यायालयीन कर्मचारीही या आंदोलनात सहभागी होणार आहेत.
प्रत्येक जिल्ह्यातील जिल्हाधिकारी कार्यालयासमोर साखळी उपोषण करण्यात येणार आहे.



शहर

महाराष्ट्र

गुन्हा

राजकीय

विडियो गॅलेरी

देश विदेश

Leave a Reply

Your email address will not be published. Required fields are marked *