Maharashtra Rain Updates

Maharashtra Rain Updates: मुसळधार पावसाच्या शक्यतेमुळे राज्यातील पालघर आणि ठाणे या दोन जिल्ह्यांमध्ये सर्व शाळा आणि महाविद्यालये आज बंद राहणार आहेत. भारतीय हवामान विभागाने (IMD) पुढील दोन दिवस राज्यातील अनेक जिल्ह्यांमध्ये मुसळधार ते अतिवृष्टीचा अंदाज वर्तवला आहे.

हवामान खात्याने शुक्रवारी पुणे आणि रायगडसाठी रेड अलर्ट तर पालघर, ठाणे, मुंबई, सातारा आणि रत्नागिरीसाठी ऑरेंज अलर्ट जारी केला. या जिल्ह्यांमध्ये गेल्या काही दिवसांपासून मुसळधार पाऊस झाला असून शुक्रवारपर्यंत पावसाचा जोर कायम राहण्याचा अंदाज आहे.

बुधवारी मुसळधार पावसाने मुंबई आणि लगतच्या ठाणे आणि पालघर जिल्ह्यांना झोडपले. उपनगरीय रेल्वे वाहतूक विस्कळीत झाली आणि सखल भागात पाणी साचले. गुरुवारी सकाळपर्यंत मुंबईत गेल्या 24 तासात सरासरी 100 मिमी पाऊस झाला असून पुढील एक दिवस शहर आणि उपनगरात जोरदार वाऱ्यासह मुसळधार ते अति मुसळधार पाऊस पडण्याची शक्यता हवामान विभागाने वर्तवली आहे.

Mulshi Dam Water Level : मुळशी धरणाच्या पाणीसाठ्यात वाढ; ५ टक्‍के असलेला साठा झाला ४० टक्‍के

शहरात झालेल्या मुसळधार पावसामुळे मुंबईला पिण्याचे पाणीपुरवठा करणाऱ्या सात जलाशयांपैकी एक असलेला तुळशी तलाव गुरुवारी ओसंडून वाहत होता. या महिन्याच्या सुरुवातीला पवई तलाव, मुंबईच्या मध्यभागी असलेला आणखी एक जलाशय, ओसंडून वाहू लागला आहे. संजय गांधी राष्ट्रीय उद्यानातील (SGNP) घनदाट जंगलात असलेला तुळशी तलाव गुरुवारी पहाटे 1.25 वाजता ओसंडून वाहू लागला.

गुरुवारी झालेल्या मुसळधार पावसामुळे रायगडच्या काही भागात पूरसदृश परिस्थिती निर्माण झाली होती. पावसामुळे जिल्ह्यातील 125 घरांचे नुकसान झाल्याने 2,200 हून अधिक लोकांना सुरक्षितस्थळी हलवण्यात आले आहे. मुसळधार पावसामुळे बुधवारी रात्री 11 वाजण्याच्या सुमारास मुंबईपासून 80 किमी अंतरावर असलेल्या खालापूर तालुक्यातील इर्शाळवाडी गावात दरड कोसळली.