Pune : २६ मोबाईलच्या वापरातून ज्येष्ठ नागरिकाला २२ कोटींचा ऑनलाइन गंडा; पुण्यातील आतापर्यंतची सर्वांत मोठी सायबर फसवणूक उघडकीस

Pune : शेअर बाजारात ऑनलाइन गुंतवणुकीतून मोठा परतावा मिळेल,’ असे आमिष दाखवून सायबर चोरट्यांनी एका ८८ वर्षीय ज्येष्ठ नागरिकाची २२ कोटी तीन लाख २२ हजार रुपयांची फसवणूक केल्याचा धक्कादायक प्रकार उघडकीस आला आहे. ही आजवरची सर्वांत मोठी सायबर फसवणूक असल्याचे पोलिसांनी स्पष्ट केले आहे. या प्रकरणी सायबर चोरट्यांविरुद्ध गुन्हा दाखल करण्यात आला असून वरिष्ठ पोलिस निरीक्षक स्वप्नाली शिंदे तपास करत आहेत.

तक्रारदार हे मूळचे गुरुग्राम (हरियाणा) येथील असून सध्या मगरपट्टा सिटी परिसरात वास्तव्यास आहेत. त्यांचा हडपसर औद्योगिक वसाहतीत छोटा कारखाना होता. करोना काळात आर्थिक अडचणीमुळे त्यांनी कारखाना विक्री केला. या व्यवहारातून मिळालेली मोठी रक्कम आणि इतर मालमत्ता विक्रीतून मिळालेले पैसे त्यांनी साठवून ठेवले होते. गेल्या वर्षी ऑक्टोबर महिन्यात सायबर चोरट्यांनी तक्रारदारांच्या मोबाइलवर संपर्क साधला. त्यांनी स्वतःला ऑनलाइन शेअर ट्रेडिंग तज्ज्ञ असल्याचे भासवून, कमी कालावधीत मोठा नफा मिळवून देण्याचे आमिष दाखवले. चोरट्यांनी त्यांना एका व्हॉट्सअ‍ॅप ग्रुपमध्ये जोडले. त्यानंतर बनावट ‘शेअर ट्रेडिंग अ‍ॅप’ डाउनलोड करण्यास सांगितले. या अ‍ॅपवर खोटी नफा-तोट्याची आकडेवारी दाखवून सुरुवातीला काही रक्कम गुंतवण्यास प्रवृत्त केले. तक्रारदाराचा विश्वास संपादन करण्यासाठी चोरट्यांनी काही दिवस तक्रारदारांच्या खात्यात लहान रक्कम जमा करून ‘परतावा मिळत आहे’ असे भासवले. त्यामुळे खात्री पटल्यावर तक्रारदारांनी वेगवेगळ्या बँक खात्यांमध्ये मोठ्या प्रमाणावर पैसे ट्रान्सफर करायला सुरुवात केली.

Pune : पुण्यात २१ व २३ जानेवारी रोजी दुपारी १२ ते ४ महत्त्वाचे रस्ते बंद; पर्यायी मार्ग कोणते? वाचा सविस्तर

२६ मोबाइलचा वापर
अवघ्या तीन महिन्यांच्या कालावधीत तक्रारदारांनी सात बँकांमधील १५० वेगवेगळ्या खात्यांत पैसे पाठवले. ही खाती मुख्यतः नोएडा, कोलकाता, बंगळुरू आदी शहरांतील ‘म्यूल अकाउंट्स’ (भाड्याने वापरली जाणारी खाती) असल्याचे आढळले आहे. फसवणुकीसाठी चोरट्यांनी २६ मोबाइल क्रमांक, एक इंटरनेट-आधारित फोन नंबर, तीन वेब लिंक आणि बनावट ‘शेअर ट्रेडिंग अ‍ॅप’ वापरल्याचे पोलिसांनी सांगितले. तक्रारदारांनी सहज बोलताना मुलाला ऑनलाइन ‘शेअर ट्रेडिंग’मध्ये गुंतवणूक करत असल्याचे सांगितले. यानंतर मुलाला संशय आला. त्यानंतर कुटुंबीयांनी पुणे सायबर पोलिसांकडे धाव घेत तक्रार दाखल केली.

‘डिजिटल अरेस्ट’ची भीती दाखवून पावणेपाच कोटींना गंडा
‘तुमच्या आधार कार्डचा वापर करून विविध राज्यांत बँक खाती उघडून ‘मनी लाँडरिंग’ करण्यात आले आहे. चौकशीसाठी तुम्हाला अटक होऊ शकते,’ अशी भीती दाखवत सायबर चोरट्यांनी कोंढवा परिसरातील एका महिलेची चार कोटी ८२ लाख १४ हजार ४१८ रुपयांची आर्थिक फसवणूक केल्याचा प्रकार उघडकीस आला आहे. या प्रकरणी पुणे सायबर पोलिस ठाण्यात गुन्हा दाखल करण्यात आला असून आरोपी अद्याप अटक झालेले नाहीत. संबंधित महिला (रा. कोंढवा) यांना १८ डिसेंबर २०२५ ते १५ जानेवारी २०२६ या कालावधीत सायबर चोरट्यांनी संपर्क साधला. त्यानुसार पीडित महिलेने एकूण चार कोटी ८२ लाख रुपये आरोपींच्या खात्यांवर जमा केले.