Pune : सलग सुट्ट्यांचा गैरफायदा! खासगी बस चालकांकडून तिकीट दरात दुप्पट वाढ; प्रवाशांच्या खिशाला मोठी झळ

Pune : प्रजासत्ताक दिनाला लागून सलग सुट्ट्या मिळत आहेत. त्यामुळे कामानिमित्त पुण्यात स्थायिक झालेले नागरिक गावी अथवा पर्यटनाला जाण्यास प्राधान्य देतात. त्यामुळे या काळात प्रवाशांची गर्दी होते. याच संधीचा फायदा घेऊन खासगी बसचालकांनी शुक्रवार, शनिवार, रविवार या दिवसांची तिकिटे दुप्पट केली आहेत. पुण्यातून मराठवाडा, विदर्भ, कोकण, खान्देशात जाणाऱ्या खासगी बसचे तिकीट दर वाढवले. आहेत. रेल्वेचे बुकिंग दोन महिने फुल्ल असल्याने ऐन वेळी रेल्वेला तिकीट मिळत नाही. त्यामुळे प्रवाशांना नाइलाजाने खासगी बसचा आधार घ्यावा लागत आहे.

प्रजासत्ताक दिनाला लागून सलग सुट्ट्या आल्यामुळे देशांतर्गत विमान प्रवासाला मोठी मागणी वाढल्याचे दिसत आहे. त्यामुळे या दिवसातील विमान तिकीट दरात मोठी वाढ झाल्याचे दिसत आहे. या काळात विदर्भ आणि मराठवाड्यात जाणाऱ्यांची संख्या वाढल्यामुळे खासगी बसचालकांनी (ट्रॅव्हल्स) तिकीट दर वाढवले आहेत. त्यामुळे पर्यटनासाठी अथवा गावी निघालेल्या प्रवाशांच्या खिशाला झळ बसणार आहे.

Pune : २६ मोबाईलच्या वापरातून ज्येष्ठ नागरिकाला २२ कोटींचा ऑनलाइन गंडा; पुण्यातील आतापर्यंतची सर्वांत मोठी सायबर फसवणूक उघडकीस

प्रजासत्ताक दिनाच्या सुटीसह शनिवार ते सोमवार अशी सलग तीन दिवस सुट्टी आहे. प्रजासत्ताक दिनाला संचलन पाहण्यासाठी दिल्लीला जाणाऱ्या नागरिकांची संख्या जास्त असते. त्यामुळे दिल्लीला जाणाऱ्या विमान तिकिटाचे दर शनिवार, रविवारी दुप्पट झाले आहेत. मुंबई-दिल्ली, पुणे-बेंगळुरू, मुंबई-गोवा, पुणे-कोलकाता अशा मार्गांवर विमानतिकिटांचे दर सर्वाधिक झाले आहेत. इतर दिवशी चार ते सहा हजार रुपयांत मिळणारी तिकिटे या कालावधीत 10 ते 15 हजार रुपयांपर्यंत पोहोचली आहेत. महत्त्वाच्या वेळांच्या फ्लाइटसाठी तर दर आणखी जास्त वाढले आहेत.

दरवाढीमुळे अनेक प्रवाशांनी रेल्वेकडे मोर्चा वळवला असून, काहींनी प्रवासाची तारीख बदलली आहे. मात्र, सुट्टीचा कालावधी मर्यादित असल्याने अनेक जण वाढीव तिकीट दर मोजून प्रवास करणार आहेत. विमान कंपन्यांकडून ही दरवाढ हंगामी आणि मागणीवर आधारित असल्याचे सांगितले जात आहे. सुट्टीपूर्वी किमान दोन ते तीन आठवडे आधी बुकिंग केल्यास तुलनेने स्वस्त दर मिळू शकतात; परंतु ऐन वेळी जाणाऱ्यांच्या खिशाला फटका बसणार आहे.