Pune Election 2026 : पुणेकरांचा दिग्गज पक्षांना फाटा! ‘NOTA’ला वाढता कौल; मतदारांच्या निर्णयाने धक्कादायक आकडेवारी समोर

Pune : पुणे महापालिकेच्या नुकत्याच पार पडलेल्या निवडणुकीत भारतीय जनता पक्षाला ४३.१२ टक्के मिळाली असून, 'नोटा'ला मिळालेली मते महाराष्ट्र नवनिर्माण सेना (मनसे), वंचित बहुजन आघाडी; तसेच आम आदमी पक्षापेक्षाही (आप) अधिक असल्याचे निकालातील आकडेवारीवरून स्पष्ट झाले आहे. शिवसेनेने एकही जागा जिंकली नसली, तरी त्यांना सात टक्के मिळाली असल्याने शहरातील चौथ्या क्रमांकाचा पक्ष ठरला आहे.

महापालिका निवडणुकीचा निकाल हाती आल्यानंतर पक्षनिहाय किती मतदान झाले, याची माहिती मिळू लागली आहे. त्यामध्ये भाजपला सर्वाधिक ४३.१२ टक्के मते मिळाली आहेत. त्याखालोखाल राष्ट्रवादी काँग्रेसला २३.९३ टक्के मते मिळाली असून, काँग्रेसला ८.४८ टक्के मिळाली आहेत. भाजप, राष्ट्रवादी काँग्रेस, शिवसेना आणि काँग्रेस या चार पक्षांनी सर्वाधिक जागा लढविल्या होत्या. त्यामुळे त्यांना मिळालेली मतेही इतरांपेक्षा अधिक आहेत.

भाजपला यंदाच्या निवडणुकीत १८ प्रभागांमध्ये मोठा फायदा झाला आहे. त्यामध्ये विमाननगर-लोहगाव, खराडी-वाघोली, कल्याणीनगर-वडगाव शेरी, औंध-बोपोडी, बावधन-भुसारी कॉलनी, शिवाजीनगर-मॉडेल गणपती-कमला छत्रपती कॉलनी, मुकुंदनगर-सॅलिसबरी पार्क, कसबा नेहरू रुग्णालय-समता भूमी, शनिवार पेठ-महात्मा फुले मंडई, नवी पेठ-पर्वती, डेक्कन जिमखाना-हॅपी कॉलनी, मयूर कॉलनी-कोथरूड, वारजे-पॉप्युलरनगर, नन्हे-वडगाव बुद्रुक-धायरी, सनसिटी माणिकबाग, सहकारनगर-पद्मावती, धनकवडी-कात्रज डेअरी, कोंढवा बुद्रुक येवलेवाडी या प्रभागांतील भाजपचे सर्व उमेदवार निवडून आले आहेत.

Pune : सलग सुट्ट्यांचा गैरफायदा! खासगी बस चालकांकडून तिकीट दरात दुप्पट वाढ; प्रवाशांच्या खिशाला मोठी झळ

भाजपला पुणे महापालिकेत शंभरी पार करण्यासाठी मतांच्या विभाजानाचा सर्वाधिक लाभ झाला असून, १३ प्रभागांतील किमान २६हून अधिक नगरसेवक निवडून आले आहेत. काही प्रभागांमध्ये, तर मर्ताच्या विभाजनाचा आकडा हा विजयी उमेदवाराच्या एकूण मतांच्या जवळपास पोहोचला आहे. उपमुख्यमंत्री अजित पवार यांनी हे मतांचे विभाजन रोखण्याचा प्रयत्न केला असता, तर भाजपला रोखणे सहज शक्य झाले असते, असे निकालातील आकडेवारीवरून स्पष्ट झाले आहे.

भाजपच्या मतांमध्ये वाढ
महापालिकेच्या निवडणुकीत भाजपला यापूर्वीच्या निवडणुकांपेक्षा अधिक मते मिळाली असल्याचे आकडेवारीवरून दिसते आहे. त्यातच निवडणूक जिंकण्यासाठी मतांचे विभाजन भाजपच्या पथ्यावर पडले आहे. महापालिकेच्या गेल्या निवडणुकीत भाजपला ३६.६७टक्के मते मिळाली होती. यंदा या मतांमध्ये वाढ झाली आहेत. गेल्या निवडणुकीच्या तुलनेत यंदा दहा लाख मतांची भर पडली. त्यामध्ये सन २०१४नंतर प्रथम मतदान करणाऱ्या मतदारांची संख्या ८० टक्के आहे. त्याचा साहजिकच फायदा भाजपला झाल्याचा दिसतो. नवमतदारांना आपल्याकडे खेचण्यात विरोधकांना येत असलेले अपयश या निवडणुकीतील कळीचा मुद्दा बनला आहे.

राजकीय पक्षांना 'नोटा'ची चिंता
महापालिकेच्या निवडणुतीत 'नोटा'ला २.९६ टक्के मते मिळाली आहेत. मनसे (२.०९), अपक्ष (१.९७), वंचित (१.०७), आप (०.६८) आणि एमआयएम (०.११) या राजकीय पक्षांमध्ये नोटाला अधिक मते मिळाली आहेत. निवडणुकांमध्ये 'नोटा'ला अधिकाधिक मते मिळण्याचा प्रकार वाढत असून, हा राजकीय पक्षांपुढील चिंतेचा विषय बनला आहे.

पक्षनिहाय मिळालेली मते (टक्क्यांमध्ये)
भाजप- ४३.१२
राष्ट्रवादी काँग्रेस- २३.९३
शिवसना-७.००
काँग्रेस= ८.४८
इतर- ९.४३
राष्ट्रवादी काँग्रेस (शप)- ३.८६
शिवसेना उबाठा- ४.१८