सोलापुरात संतापजनक प्रकार; ७०० कुटुंबांचा एकमेव वहिवाटीचा रस्ता खोदल्याने नागरिकांसह खासदार प्रणिती शिंदेंचा खड्ड्यात ठिय्या

सोलापूर शहरातील बॉम्बे पार्कजवळील गणेश बिल्डर स्कीम क्रमांक तीनमधील सुमारे सातशे नागरिकांच्या ये-जा करण्याचा एकमेव रस्ता खोदून पूर्णपणे बंद करण्यात आल्याने नागरिकांमध्ये प्रचंड संताप निर्माण झाला आहे. या मनमानी कारभाराविरोधात संतप्त नागरिकांनी थेट खोदलेल्या रस्त्यातील खड्ड्यातच बसून ठिय्या आंदोलन केले. या आंदोलनात काँग्रेसच्या खासदार प्रणिती शिंदे यांनीही प्रत्यक्ष सहभाग नोंदवत प्रशासनाच्या विरोधात तीव्र रोष व्यक्त केला. गर्भवती महिला, लहान मुले आणि ज्येष्ठ नागरिकांसह शेकडो रहिवासी रस्त्याच्या खड्ड्यात आंदोलनासाठी बसल्यामुळे प्रशासनाची मोठी तारांबळ उडाली.

मिळालेल्या सविस्तर माहितीनुसार, बॉम्बे पार्क परिसरातील या वसाहतीत सुमारे ७०० ते ८०० नागरिक वास्तव्य करतात. या नागरिकांना बॉम्बे पार्क रस्त्याला जोडणारा केवळ एकच वहिवाटीचा रस्ता होता. मात्र, लगतच्या लेआउटधारकाने किंवा बांधकाम व्यावसायिकाने हा उरलासुरला रस्ताही खोदून टाकल्यामुळे नागरिकांची ये-जा पूर्णपणे बंद झाली. यापूर्वीही या रस्त्याच्या प्रश्नासंदर्भातील वादात नागरिकांनी निवडणुकीवर बहिष्कार टाकण्याचा इशारा दिला होता, तेव्हा प्रशासनाने व लोकप्रतिनिधींनी हा प्रश्न सोडविण्याचे आश्वासन दिले होते. याशिवाय, सोसायटीच्या अध्यक्षा ॲड. निता जोशी यांनी या प्रकरणी न्यायालयातही धाव घेतली होती. प्रकरण न्यायप्रविष्ट असतानाही बाजूच्या बांधकामधारकाने मनमानी करत रस्ता खोदून वाट बंद केल्यामुळे नागरिकांचा संयम सुटला.

घटनास्थळावर झोनल अधिकारी किंवा स्थानिक नगरसेवक यापैकी कोणीही जबाबदार प्रतिनिधी न आल्याने आंदोलक अधिक आक्रमक झाले. तब्बल चार तास चाललेल्या या आंदोलनाची गंभीर दखल घेत महापालिका आयुक्त डॉ. सचिन ओम्बासे यांनी नगररचना विभागाच्या अधिकाऱ्यांना घटनास्थळी पाहणीसाठी पाठवले. अधिकाऱ्यांनी पाहणी केली असता, नागरिकांनी त्यांना पूर्ण खोदून टाकलेला रस्ता दाखवला, ज्यामुळे अधिकाऱ्यांची बोलतीच बंद झाली. प्रकरण न्यायप्रविष्ट असताना रस्ता कसा खोदला गेला, याचे उत्तर प्रशासन देऊ शकले नाही. अखेरीस, रात्री उशिरा महापालिकेने तीन जेसीबीच्या साहाय्याने तात्पुरत्या स्वरूपात वहिवाटीसाठी रस्ता मोकळा करून दिल्यानंतर हे आंदोलन मागे घेण्यात आले.