Mumbai Mayor : ९-१० फेब्रुवारीला निवडणूक नको; ‘या’ कारणामुळे नगरसेवकांची मागणी, महापौर निवड दुसऱ्या आठवड्यात?

Mumbai : मुंबई महापालिका निवडणूक झाल्यानंतरही महापौरपदासह विविध समिती अध्यक्षपदांचा तिढा सुटलेला नाही. त्यामुळे गट नोंदणीही होऊ शकलेली नाही. उपमुख्यमंत्री अजित पवार यांचे निधन झाल्याने तीन दिवस पाळण्यात आलेला दुखवटा आणि काही नगरसेवकांनी ९ आणि १० फेब्रुवारीला आंगणेवाडी जत्रेमुळे नंतरच महापौर निवडणूक घेण्याची केलेली मागणी यामुळे महापौर निवडणूक १० फेब्रुवारीनंतरच होण्याची शक्यता आहे.

मुंबई महापौर पदाकडे लक्ष
मुंबई महापालिका निवडणुकीनंतर महापौर कोणाचा होणार याकडे लक्ष आहे. महायुतीकडून यावर शिक्कामोर्तब झालेले नाही. त्यातच भाजप आणि शिवसेनेमध्ये स्थायी, सुधार, शिक्षण, बेस्ट यासह अन्य समित्यांचे अध्यक्षपद मिळवण्यासाठी चढाओढ आहे. यावर अंतिम निर्णय झालेला नसतानाच एकनाथ शिंदे यांच्या शिवसेनेने स्वतंत्ररित्या गट नोंदणी करण्याचा निर्णय घेतला होता. मात्र, हा निर्णय मागे पडला आणि भाजप-शिवसेनेने एकत्र गट नोंदणी करण्याचा निर्णय घेतला. अद्याप तरी ही गट नोंदणी झालेली नाही.

ZP Election : अजित पवारांच्या निधनानंतर राष्ट्रवादीचा मोठा निर्णय; पुण्यात जिल्हा परिषद निवडणुकीचा प्रचार तात्पुरता स्थगित

उपमुख्यमंत्री अजित पवार यांच्या निधनामुळे राज्य सरकारने तीन दिवस, शुक्रवारपर्यंत दुखवटा जाहीर केला आहे. तोपर्यंत एकत्रित गट नोंदणी व अन्य प्रक्रियेबाबत काही निर्णय होणार नाही. शनिवारी-रविवारी कोकण भवन बंद असल्याने गट नोंदणी करण्याची प्रक्रिया आता पुढील आठवड्यातच होण्याची शक्यता आहे.

सात दिवसांचा अवधी
गट नोंदणीनंतर महापौर निवडणुकीसाठी सूचना काढली जाते. यामध्ये सात दिवस दिले जातात आणि त्यात नामनिर्देशन अर्ज स्वीकारले जातात. त्यानंतरच निवडणूक होते. ही प्रक्रिया फेब्रुवारीच्या पहिल्या आठवड्यापर्यंत चालण्याची शक्यता आहे. त्यातच आंगणेवाडीची जत्रा असल्याने ९ आणि १० फेब्रुवारीला महापौर निवडणूक नको, त्याआधी किंवा नंतर घ्यावी, अशी मागणी काही नगरसेवकांनी केली आहे.

फेब्रुवारीच्या पहिल्या आठवड्यात महापौर निवडणूक घेणे शक्य नसल्याची माहिती सूत्रांनी दिली. त्यामुळे दुसऱ्या आठवड्यातच महापौर निवडणुकीची शक्यता असल्याचे सांगण्यात आले. महापौर निवडणूक लांबणीवर पडल्यास महापालिकेतील अन्य वैधानिक समित्यांच्या निवडणुकाही उशिरा पार पडतील.